VOV4.Êđê- Aguah hruê 15/4, Anôk gĭt gai mlir dhar bruă kơ klei doh êƀăt mnơ̆ng ƀơ̆ng čar Daklak mkŏ mjing leh Klei bi kƀĭn pŏk hluê ngă Mlan ngă bruă kyua klei doh êƀăt mnơ̆ng ƀơ̆ng thŭn 2021 mkŏ mjing mơ̆ng hruê 15/4 truh kơ hruê 15/5/2021 hŏng anăn “Rơ̆ng kjăp klei doh êƀăt mnơ̆ng ƀơ̆ng, gang mkhư̆ klei ƀơ̆ng djŏ mnơ̆ng ruă hlăm boh klei mrâo”.

Mta kñăm mơ̆ng Mlan ngă bruă anei jing mđĭ hdră mtô mblang klă nik, pral, kluôm ênŭm, bŏ hŏng klei đua klam kơ klei doh êƀăt mnơ̆ng ƀơ̆ng kñăm mđĭ bruă klam mơ̆ng dŭm êpul êya bruă, mnuih, anôk bruă duh mkra hlăm klei hluê ngă sjŏ hdră bhiăn kơ klei doh êƀăt mnơ̆ng ƀơ̆ng. Mtrŭt mđĭ hdră ksiêm dlăng kơ klei doh êƀăt mnơ̆ng ƀơ̆ng ti dŭm anôk bruă duh mkra mnia mblei kñăm bi hrŏ klei ƀơ̆ng djŏ mnơ̆ng ruă. Bruă pŏk hluê ngă Mlan ngă bruă kyua doh êƀăt mnơ̆ng ƀơ̆ng srăng đru kơ čar Dak Lak mđĭ klei thâo săng, klei đua klam mơ̆ng dŭm gưl, dhar bruă, êpul êya, mnuih hlăm bruă mkra mjing, mnia mblei mnơ̆ng ƀơ̆ng, bi hrŏ klei blei yua mnơ̆ng amâo doh êƀăt hlăm wăl anôk mnia mblei./.

                                                    Pô mblang: H’Nêč Êñuôl