VOV4.Êđê-  Msĕ si Sang mđung asăp blŭ Việt Nam hưn mthâo, leh 12 thŭn dôk čang guôn, mnuih ƀuôn sang ti ênao êa Akŏ krông Pač mphŭn dưi nao mbĕ kơ anôk dôk mrâo. Dŭm gưl bruă sang čư̆ êa dôk bi h’ĭt klei hdĭp kơ mnuih ƀuôn sang.

Hluê si hdră kčah, êbeh 700 gŏ êsei hŏng giăm 4 êbâo čô mnuih ti 3 alŭ 9, 10, 11 să Čư̆ San, kdriêk Mdrak srăng dưi nao mbĕ kơ anôk dôk mrâo mrô 1 hlăm să Čư̆ Êlang lehanăn krĭng anôk dôk mrô 2 hlăm să Čư̆ Bông, kdriêk Êa Kar čiăng mkăp kơ klei hluê ngă bruă ti knơ̆ng kdơ̆ng êa 4.400 êklai prăk Akŏ krông Pač.

Truh ară anei, hŏng klei mtrŭt mđĭ ai mơ̆ng dŭm gưl bruă sang čư̆ êa alŭ wăl lehanăn hŏng klei dôk mâo, dŭm gŏ êsei nao mbĕ kơ anôk mrâo dưi rơ̆ng klei hdĭp jăk hĭn, ênoh gŏ êsei bi mklă nao mbĕ kơ anôk mrâo truh giăm 200 gŏ êsei. Anôk bruă sang čư̆ êa kdriêk Mdrak brei thâo, kdriêk dôk kƀĭn iêu mtrŭt djăp êpul êya bruă, đru kơ mnuih ƀuôn sang nao mbĕ anôk dôk, mjing klei sa ai, hŏng klei gĭr hnưm dưi bi leh bruă klam mkŏ mkra anôk dôk mrâo kơ mnuih ƀuôn sang krĭng ênao êa Akŏ krông Pač./.

Pô mblang: H’Nêč Êñuôl