VOV4.Êđê - Hŏng hdră ba klei “Guh mngač êlan klông krĭng ƀuôn sang’’, dŭm pluh kilomet êlan klông krĭng knông lăn Dak Lak dưi mkŏ dưm kdrăp pui kmlă mtrang mngač, mjing klei găl kơ mnuih ƀuôn sang găn êrô lehanăn đru rơ̆ng kjăp klei êđăp ênang ti krĭng knông lăn.

Akŏ mlan 3 thŭn anei, mnuih ƀuôn sang ti alŭ 8, să Ia Rvê, kdriêk Ea Sup, čar Dak Lak hơ̆k mơak leh ktuê êlan phŭn hlăm alŭ dưi mkŏ mkra kdrăp pui kmlă mtrang mngač. Hdră “mtrang mngač êlan ƀuôn sang” ti alŭ 8 dlông êbeh 1 km, hŏng 20 gơ̆ng pui mtrang mngač, yua pui kmlă êran hŏng pil yang hruê, ênoh bi liê 35 êklăk prăk. Anei jing bruă ngă hlăm hdră “Mlan tlâo knông lăn” mơ̆ng bruă êdam êra čar Dak Lak bi hgŭm hŏng bruă êdam êra čar Lâm Đồng pŏk ngă ti krĭng knông lăn čar Dak Lak, hlăm anăn bruă êdam êra čar Lâm Đồng đru prăk blei kdrăp mnơ̆ng, êpul êdam êra lehanăn mnuih ƀuôn sang alŭ wăl đru hruê mkŏ dăp. Phạm Hồng Lĩnh, alŭ 8, să Ia Rvê, kdriêk Ea Sup lač, mơ̆ng leh mâo êlan pui kmlă mtrang, dŭm bruă ngă mnuih ƀuôn  sang ti alŭ jăk mơak hĭn, grăp čô bŏ hŏng klei hơ̆k mơak.“Wưng ka mkŏ dăp pui kmlă mtrang hlăm êlan klông snăn mâo lu klei amâo jăk. leh dưi mâo pui mtrang snăn mnuih ƀuôn sang hơ̆k mơak, tal sa jing klei êđăp ênang hlăm ƀuôn sang, mnuih ƀuôn sang tŭ ư leh anăn jăk mơak êdi. Mơ̆ng leh mâo êlan pui kmlă anei snăn mnuih ƀuôn sang nao mjuăt ktang asei mlei leh anăn grăp mlam truh 9 mmông krah, 10 mmông mmăt kơh nao pĭt.”

Êlâo anăn, mơ̆ng knhal jih thŭn dih, ti ƀuôn Drang Phôk, să Krông Ana, kdriêk Ƀuôn Đon, hdră mtrang mngač êlan ƀuôn sang ăt dưi pŏk ngă mâo boh dlông 1km mkrah hŏng 27 anôk dưm Ăngpul pui. Y-Čuôn Ƀuôn Krông, mnuih ƀuôn sang ƀuôn Drang  Phôk brei thâo, hdră bruă anei mơ̆ng leh bi leh leh anăn ba yua truh ară anei mâo lu klei tŭ dưn jăk. Mâo pui kmlă mtrang amâo djŏ knŏng đru kơ bruă êrô êbat jăk, rơ̆ng klei êđăp ênang đuič ôh ƀiădah lŏ ba kơ êlan klei jăk siam hĭn, mnuih ƀuôn sang čŏng kriê mgang kdrăp mnơ̆ng mbĭt lu hĭn.“Jih jang mnuih ƀuôn sang mơak sơaĭ, kyua mâo pui mngač, hiu mmăt mlan, sĭt ruă duam êngoh ê ăt hiu êmuh hrăm snăn mâo pui mtrang dưi ƀiă klei dleh dlan, hmei mơak snăk.”

 Truh mmông anei, ti  Dak Lak mâo leh 8 alŭ, ƀuôn krĭng knông lăn dưi ba kdrăp pui mtrang mngač hlăm ƀuôn sang hŏng hlăm brô 13 km êlan krĭng ƀuôn sang. Hlăm ênoh anei mâo mta bruă mơ̆ng Knơ̆ng bruă pui kmlă Dak Lak đru, knuă druh lĭng kahan dŭm kđông răng mgang knông lăn bi hgŭm mkŏ mjing. Đa đa bruă mâo Êpul Bruă êdam êra čar Dak Lak iêu jak yang ƀuôn đru ngă ba pui mtrang mngač kơ mnuih ƀuôn sang krĭng knông lăn.

 Ayŏng Y Lê Pas Tơr,  K’iăng Khua bruă êdam êra čar Dak Lak brei thâo, mơ̆ng thŭn 2014 truh ară anei, bruă mtrang mngač êlan ƀuôn sang dưi mâo dŭm gưl ti Dak Lak pŏk ngă hŏng lu hdră pral. Dŭm anôk bruă êdam êra leh anăn bruă êdam êra nah gŭ iêu jak klei găl čiăng pŏk ngă mta bruă, bi hgŭm hŏng anôk bruă pui kmlă dŭm kdriêk rŭ mdơ̆ng, mkŏ dưm pui mtrang mngač ti dŭm wăl mnuih ƀuôn sang.

 Mbĭt hŏng anăn, hlăm 2 thŭn hŏng anei, bruă êdam êra čar Dak Lak lŏ dơ̆ng pŏk ngă hdră mtrang mngač hlăm êlan knông lăn, kƀĭn klei găl mtrang mngač dŭm ktuê êlan hlăm dŭm alŭ ƀuôn krĭng knông lăn. Hdră kñăm truh thŭn 2022 srăng hluê ngă 20 km êlan knông lăn dưi mtrang mngač.“Jih jang klei găl dưi ba yua 100%. Leh anăn anăp truh Anôk bruă êdam êra čar mĭn tĭng srăng dưm pui mtrang mngač ktuê êlan knông lăn. Snăn anei jing bruă dôk akâo klei mtrŭn mơ̆ng gưl bruă Đảng leh anăn lŏ iêu jak klei đru mkăn. Leh anăn mta phŭn kơ hdră mtrang mngač êlan klông ti knông lăn snăn srăng sui, mĭn tĭng hlăm brô 20 km hlăm wưng thŭn 2017-2022, gĭr êlâo kơ jih wưng thŭn, êlâo kơ klei bi kƀĭn bruă êdam êra čar mkŏ mjing snăn srăng bi leh hdră kčah anei leh anăn hưn mdah ti anăp klei bi kƀĭn.”

 Dŭm mta bruă mkŏ mkra pui mtrang mngač hlăm êlan krĭng ƀuôn sang dưi pŏk ngă đru răng mgang klei êđăp ênang, mđĭ klei hdĭp mnơ̆ng dhơ̆ng, ai tiê kơ mnuih ƀuôn sang ti dŭm krĭng dưi dưn. Hŏng mnuih ƀuôn sang hdĭp mda hlăm krĭng knông lăn ti čar Dak Lak, dŭm bruă anei ba leh klei tŭ dưn klă sĭt, đru bi mlih ƀô̆ mta krĭng ƀuôn sang, rơ̆ng klei êđăp ênang krĭng wăl knông lăn.