VOV4.Êđê - Dak Lak kčưm mŭt hlăm yan bhang thu krô, klei čiăng ba yua pui kmlă đĭ. Čiăng rơ̆ng kjăp klei êđăp ênang pui kmlă, mkăp pui kmlă h’ĭt kjăp, boh nik mkăp kơ hdră mdrơ̆ng hŏng klei adiê không kƀah êa kơ dŭm êtuh êbâo ha kphê, tiu, Anôk bruă pui kmlă Dak Lak pral pŏk ngă dŭm hdră msir kñăm mkăp djăp pui kmlă hlăm yan bhang anei.

Ară anei, klei ba yua pui kmlă ti Dak Lak đĭ hlăm brô 7% mkă hŏng wưng anei thŭn êlâo. Čiăng rơ̆ng kjăp hdră mkăp pui kmlă, PC Dak Lak ba yua leh kdrăp SCADA hluê ngă hdră kriê dlăng mơ̆ng kbưi, pral bi leh anôk mkŏ hŏng hdră bruă mrâo, tĭng dlăng hdră lŏ mkŏ dưm dŭm anôk mđĭ trŭn pui kmlă kơ grăp krĭng wăl phŭn… Anôk bruă pui kmlă ăt mđĭ hdră ksiêm dlăng êlan pui kmlă, bi hgŭm kjăp hŏng anôk bruă sang čư̆ êa alŭ wăl hlăm bruă răng mgang êlan klei pui kmlă. Anôk bruă pui kmlă čar Dak Lak mtă kơ jih 15 êpul êya mâo hdră ngă bruă djŏ guôp lehanăn mprăp kdrăp mđĭ mtrŭn pui kmlă mkăp kơ bruă rơ̆ng klei êđăp ênang pui kmlă nanao đrông kơ phung ba yua hlăm kluôm krĭng wăl.

Ti sa krĭng thơ̆ng ba pla ana sui thŭn mơ̆ng čar Dak Lak, Nguyễn Đình Lâm, Khua anôk bruă pui kmlă Ƀuôn Hô brei thâo, êpul êya hluê ngă leh kjăp dŭm hdră msir kñăm mkăp djăp pui kmlă hlăm yan bhang hluê si klei gĭt gai mơ̆ng čar:

Boh nik ti dŭm krĭng kreh pom krih êa nanao, dŭm krĭng ba yua pui kmlă lu, hmei srăng ksiêm dlăng nanao phŭn mkăp pui kmlă kñăm rơ̆ng klei êđăp ênang. Dŭm krĭng mkăn hmei ăt mđĭ hdră msir rơ̆ng kjăp klei êđăp ênang mơh. Hŏng dŭm krĭng amâo jăk dưi ktŭng pui kmlă hmei srăng bi mlih dưm kdrăp maĭ mđĭ trŭn pui kmlă bi djŏ guôp k`ăm rơ̆ng mkăp djăp pui kmlă hlăm yan bhang anei.

H’Nêč pô mblang