VOV4.Êđê-  Kñăm mkăp kơ gưl ruah pô bi ala Quốc hội gưl XV lehanăn bi ala HĐND dŭm gưl wưng thŭn 2021 – 2026, anôk bruă pui kmlă PC Dak Lak hlăk lehanăn dôk pŏk ngă dŭm hdră mkăp pui kmlă h’ĭt kjăp, êđăp ênang, nanao đrông truh kơ grăp êpul êya hlăm gưl mkŏ mjing klei ruah khua. Hluê si Trần Tấn Phụng – K’iăng khua anôk bruă pui kmlă Dak Lak, êlâo kơ ruah khua, anôk bruă gĭt gai leh dŭm êpul êya djŏ tuôm, ksiêm dlăng êlan pui kmlă ti jih jang anôk ruah khua kñăm rơ̆ng hdră mkăp pui kmlă. Anôk bruă ăt mâo hdră kčah ngă bruă, hŏng 100% ênoh mnuih mă bruă dok gak răng, mprăp kdrăp mnơ̆ng kñăm msir mghaih pral boh klei tăm mâo:

“Hmei mprăp leh sa boh masin mkăp pui mbĕ hiu hŏng hnơ̆ng 250 KVA tơdah tăm mâo klei truh luič pui kmlă ti dŭm anôk ruah khua hlăm ƀuôn prŏng Ƀuôn Ama Thuôt čiăng pral nao mkăp pui mtam; êngao anăn, ti 16 kdriêk, wăl mkrah ăt mprăp dŭm kdrăp masin mâo hnơ̆ng mơ̆ng 5 – 10KVA mbĭt hŏng mnuih mă bruă dôk gak răng čiăng pral msir mghaih msir mghaih klei truh, amâo lui gun kpăk bruă mkăp pui kmlă.

Hdră ruah pô bi ala Quốc hội gưl XV lehanăn bi ala HĐND dŭm gưl wưng thŭn 2021 – 2026 ti Dak Lak, mâo êbeh 1 êklăk 200 êbâo čô nao ruah ti 1.849 êpul mplĕ hră, hlăm anăn mâo 8 êpul ti să knông lăn srăng dưi ruah khua hnưm hlăm hruê 22/5, bi adôk 1.841 srăng dưi mplĕ hră ruah hlăm hruê 23/5./.

                                                    Pô mblang: H’Nêč Êñuôl