VOV4.Êđê-  Knơ̆ng bruă ruah khua čar Dak Lak brei thâo, kluôm čar srăng mâo 1.794 krĭng wăl mplĕ hră hŏng 1.802 anôk mplĕ hră ruah khua quốc hội XV leh anăn bi ala HĐND čar wưng thŭn 2021-2026. Ti anăp boh klei ruă tưp Covid-19, hdră gang mkhư̆ klei ruă tưp ti dŭm krĭng wăl anei srăng dưi pŏk ngă tliêr kjăp, rơ̆ng êđăp ênang kơ hruê ruah kơ anăp.

Bruă mdrao mgŭn čar Dak Lak hlăk dôk ktuê dlăng tliêr kjăp klei ruă tưp Covid-19 hlăm leh anăn êngao čar, rơ̆ng klei bi hgŭm tliêr kjăp plah wah anôk bruă ruah leh anăn Anôk bruă giưt gai gang mkhư̆ klei ruă tưp Covid-19 dŭm gưl. Bruă djŏ tuôm mprăp mnuih mă bruă, kdrăp mnơ̆ng, êa drao pioh kơ bruă gang mkhư̆ klei ruă Covid-19 hlăm wưng mkŏ mjing klei ruah khua. Knơ̆ng bruă ruah khua mtă brei gang mkhư̆ klei ruă tưp, mâo ênhă djăp prŏng, čiăng bi ktlah bi kbưi sĭt mplĕ Hră. Jih jang phung bi ala leh anăn phung ngă bruă ruah khua brei truă čhiăm guôm ƀô, êa drao mdjiê kman.

Pô mblang: H’Zawut Ƀuôn Yă