VOV4.Êđê- Ti să Êa Sôr, kdriêk Êa Kar, čar Dak Lak, sa boh klei tlĕ kuai mă čuah soh hŏng hdră bhiăn truh dŭm êbâo m3 mâo sa êpul bruă kuai mă mnơ̆ng hlăm gŭ lăn mkŏ mjing, ti djiêu êlan dơ̆ng prŏng mrô 29. Anôk kuai mă čuah anei jing anôk bi mklin ba čuah mơ̆ng 3 čar Phú Yên, Gia Lai lehanăn Dak Lak, mâo leh 2 thŭn hŏng anei, amâo uêñ kơ mnuih ƀuôn sang mâo lu blư̆ hưn mthâo truh kơ anôk bruă sang čư̆ êa alŭ wăl.

Hlăm sa hruê knhal jih mlan 4, hmei truh ti tač mă čuah soh hŏng hdră bhiăn ti ƀuôn Ea Puk, să Ea Sôr, kdriêk Ea Kar, čar Dak Lak. Ti anôk anei, mâo sa tač mklin čuah prŏng prĭn, hŏng dŭm êbâo m³ čuah dưi bi mklĭn ti djiêu êlan dơ̆ng prŏng 29. Hlăm kdrăn čuah anăn, khua knơ̆ng bruă mâo klei rŭ mkra lu boh sang čiăng kiă kriê bruă čhĭ mnia čuah, mâo truh kơ giăm 10 čô mnuih mă bruă tinăn. Hờ A Sủng, khua ƀuôn Ea Puk brei thâo, tač čuah anei mâo klei čăt đĭ mơ̆ng thŭn 2019 leh anăn mơ̆ng hruê mâo tač čuah anei, ngă mâo klei mtŭk mtŭl kơ mnuih ƀuôn sang. Hŏng lu boh êdeh prŏng mdiăng lu, dŭ mdiăng čuah mŭt kbiă hlăm tač leh anăn bi jhat êlan klông bruă duh mkra, hdĭp mda mơ̆ng mnuih ƀuôn sang leh anăn bi jhat wăt kơ êlan dơ̆ng prŏng mrô 29, lu anôk êlan mâo klei rai mčah, ngă klei arưp srăng mâo klei truh hlăm êlan klông, lehanăn ƀuôn sang mâo klei rŭng răng wăt klei đĭ ai:

“Mnuih ƀuôn sang mâo leh lu klei blŭ kơ bruă bi mklin čuah sa anôk, êdeh dŭ mdiăng jing êdeh prŏng, mâo hlăm ƀrô 15-20 ƀoh êdeh nao dŭ mdiăng čuah. Êjai mmông dŭ mdiăng ngă klei bi jhat êlan klông lu lĭn bi truh klei rŭng răng hlăm klei hdĭp mnuih ƀuôn sang. Mnuih ƀuôn sang mâo lu leh klei blŭ, klei akâo truh kơ bruă sang čư̆ êa sa, leh anăn să lač mâo leh klei akâo truh kơ kdriêk, sơnăn dôk guôn si ngă klei srăng msir mgaih mơ̆ng kdriêk, mnuih ƀuôn sang ka thâo ôh”.

Tač čuah mă soh hŏng hdră bhiăn ngă bruă êbeh 2 thŭn

Hoàng Anh Dũng, k’iăng khua bruă sang čư̆ êa să Ea Sôr, kdriêk Ea Kar brei thâo, anôk bi mklin čuah soh hŏng hdră bhiăn hlăm anôk lăn mrô 105, hră bi knăl lăn mrô 5 hŏng ênhă giăm 13.000 m². Ênhă lăn anei mơ̆ng Phan Đình Thái Anh (kkiêng thŭn 1979, dôk ti ƀuôn hgŭm Thành Nhất, ƀuôn prŏng Ƀuôn Ama Thuột) jing pô lăn. Hoàng Anh Dũng bi klă ênhă lăn anei dôk yua kơ bruă pla mjing lŏ hma leh anăn anei jing bruă ngă soh hŏng klei bhiăn ba yua lăn. Hlăm mlan 3/2020, să Ea Sôr mkŏ mjing leh êpul nao ksiêm dlăng leh anăn bi mklă mâo hlăm ƀrô 10.000 m³ čuah mâo klei bi mklin soh hŏng hdră bhiăn ti nei, să mâo leh klei kâo kơ gưl kdriêk srăng nao hgŭm čiăng mgaih msir bruă anei:

Hlăm bruă klam hlăm bruă knŭk kna, bruă anei êgao leh hnơ̆ng klei dưi mơ̆ng gưl să, să mâo leh hră akâo, čiăng mâo dhar bruă gưl dlông ktrâo êlan lehanăn nao hgŭm srăng dưi mgaih msir bruă anei.”

Djŏ tuôm hŏng bruă tač čuah mâo klei ba mklin truh kơ dŭm êbâo m³ soh hŏng hdră bhiăn ti djiêu êlan dơ̆ng prŏng mrô 29, Nguyễn Ngọc Duẩn, khua adŭ bruă ngăn dŏ leh anăn wăl hdĭp mda kdriêk Ea Kar brei thâo, ti kdriêk dưi mkŏ mkra leh sa êpul bi mguôp lu dhar bruă msĕ si dŭm knơ̆ng bruă ngăn dŏ, kahan ksiêm, prăk jia nao ksiêm dlăng tač čuah anei. Knhuang êlâo hĭn dưi bi mklă, knơ̆ng bruă mâo klei ba yua anôk anei soh hŏng hdră bhiăn. Bi kơ phŭn agha čuah anăn, hlăm dŭm klei hưn mdah mơ̆ng knơ̆ng bruă, čuah anei dưi mâo klei dŭ mdiăng ba mơ̆ng 2 čar Phú Yên leh anăn Gia Lai.

 Dŭm pluh boh êdeh mdiăng čuah prŏng khăng mŭt nanao ngă kơ mnuih ƀuôn sang Ea Puk

Êpul bi mguôp lu dhar bruă knŏng mâo klei ksiêm dlăng kơ hră mơar jia ƀiădah ka dưi bi klă hnơ̆ng čuah mâo klei bi mklin anei djŏ hŏng hdră bhiăn amâo dah hơăi. Bi kơ boh phŭn să mâo leh klei kčŭt hưn ƀiădah tač čuah ăt dôk mơ̆ng thŭn 2019 truh kơ ară anei, Nguyễn Ngọc Duẩn lač, bruă bi kmhal dŭm klei ngă soh jing dleh dlan êdi kyua kƀah mnuih mă bruă. Kơ klei mĭn hlăm bruă ngă soh, Nguyễn Ngọc Duẩn lŏ lač, kdriêk Ea Kar srăng ngă kjăp bruă mgaih msir leh anăn brei knơ̆ng bruă srăng ba mđuê̆ kơ anôk mkăn, lŏ ba wĭt klei ba yua lăn:

Băng: “Anei jing bruă ba yua lăn soh hŏng hdră bhiăn, leh kơ klei đŭ prăk srăng lŏ brei knơ̆ng bruă lŏ ba wĭt ênhă lăn msĕ hŏng êlâo. Sitôhmô hlăm hnơ̆ng čuah 3 êbâo m³ srăng mâo klei ba mđuê̆ hlăm 30 hruê.”

Sa tač bi mklin čuah soh hŏng hdră bhiăn truh kơ dŭm êbâo m³, ti djiêu êlan dơ̆ng prŏng mrô 29, lu êdeh êdâo êrô nao, lu mnuih ƀuh hŏng ală mta, mâo klei bi êdah mơ̆ng lu mnuih ƀuôn sang, ƀiădah hlăm 2 thŭn ka mâo ôh klei mgaih msir kluôm ênŭm. Bruă aneu brei ƀuh, bruă ksiêm dlăng lăn ala, čhĭ mnia mnơ̆ng dhơ̆ng hlăm lăn hlăm alŭ wăl dôk mâo klei ka djŏ. Klei arưp kơ bruă ba čhĭ čuah soh hŏng hră bhiăn jing lu êdi.

Pô mblang: Y-Khem Niê