VOV4.Êđê - Kƀah êa yua hlăm klei hdĭp aguah tlam dôk ngă kơ klei hdĭp mơ̆ng giăm 500 gŏ êsei mnuih ƀuôn sang ti să Dak R’La, kdriêk Dak Mil, čar Dak Nông dleh dlan. Lu gŏ êsei mưn yua mnuih ktir kbăng êa dŭm pluh êklăk prăk ƀiădah ăt kăn mâo êa.

Êbeh sa mlan hŏng anei gŏ sang aduôn Trần Thị Bích Phượng lehanăn lu gŏ sang ti alŭ 5, să Dak R’la mguôp prăk grăp hruê, blei truh kơ êbâo lĭt êa lehanăn wĭt bi mbha yua, kyuadah dŭm boh kbăng êa ti alŭ khuôt jih. Aduôn Trần Thị Bích Phượng brei thâo, kyua klei amâo djăp êa yua grăp hruê hmăi lu êdi kơ klei hdĭp mnuih ƀuôn sang. Grăp gŏ sang mâo sơăi mnuih nao dôk kăp ti anôk blei êa čiăng mă êa ba wĭt.“Jih jang mnuih ƀuôn sang ti nei amâo mâo djăp êa yua lehanăn nao blei êa sơăi, hlăm sa hruê hmei blei hlăm ƀrô 1.500 lĭt êa, blei tơdah čiăng mâo êa yua. Hmei hmăng hmưi dŭm gưl bruă srăng mâo hdră êlan đru amâo dah ba kơ hmei sa phŭn êa doh, čiăng kơ mnuih ƀuôn sang mâo êa yua grăp hruê lehanăn mâo klei êđăp ênang hlăm klei hdĭp”

Amâo djŏ knŏng blei êa yua hlăm grăp hruê, gŏ sang aduôn Phạm Thị Vân, ti alŭ 3, să Dak R’la lŏ duh bi liê dŭm pluh êklăk prăk mưn arăng ktar kbăng êa čiăng duah êa yua, aduôn Phạm Thị Vân brei thâo, gŏ sang hmei mâo klei myun, sơnăn dưi ktar djŏ êlan êa mur, dŭm gŏ sang mkăn ktar truh kơ dŭm êtuh met hlăm gŭ lăn ƀiădah amâo mâo êa ôh.“Ti alŭ wăl anei dleh sơnăk hlăm klei klei băng êa, gŏ sang hmei duh bi liê 40 êklăk prăk mưn arăng ktar băng êa ƀiădah duah anôk mâo êa jing dleh dlan êdi. Mâo 2 truh kơ 3 hruê dưi pom bŏ kơ prŏng êa yua grăp hruê. Truh kơ ară anei, gŏ sang ăt dôk duh bi liê prăk blei êa hlăm giêt ba wĭt yua grăp hruê.”

Ăt msĕ sơnăn, ti alŭ 2 hlăm să Dak R’la, ară anei mâo 30 boh gŏ sang dôk duh bi liê mưn arăng ktar băng êa čiăng êa yua hlăm grăp hruê, khădah 28 boh băng êa amâo mâo ƀuh êa ôh. 3 boh băng êa mâo klei knŭk kna duh bi liê mơ̆ng lu thŭn êlâo ăt khuôt jih mơh.

Tui hlue klei ksiêm dlăng mơ̆ng bruă sang čư̆ êa să Dak R’la, hlăm kluôm ênŭm să mâo hlăm ƀrô 500 gŏ êsei, hŏng êbeh 1.500 mnuih ƀuôn sang dôk hlăm klei amâo djăp êa yua grăp hruê, boh nĭk kñăm hlăm alŭ 2, alŭ 3 lehanăn alŭ 5. Ngô Quang Văn, k’iăng khua gĭt gai bruă sang čư̆ êa să Dak R’la mblang: Dŭm alŭ hlăm să jing anôk dôk ti kngư hĭn, kbưi hŏng êa hnoh. Hlăm anăn kluôm ênŭm să mâo knŏng sa anôk mkăp êa doh ti alŭ 7, kyuanăn amâo mâo dưi djăp êa yua ôh.“Alŭ wăl mâo leh klei mtrŭt mjhar kơ mnuih ƀuôn sang msir mgaih klei dleh dlan hŏng hdră êlan mkiêt êa yua, yua djŏ hnơ̆ng, kơ bruă čiăng sui thŭn, ktar băng êa amâo dưi mâo boh tŭ dưn ôh. Să mâo leh klei akâo kơ čar Dak Nông čiăng mâo hdră êlan sui jing pom êa doh ti anôk mkăp êa Đu Ri 2 ti alŭ 5 lehanăn dưm anôk pom ti anôk bruă sang čư̆ êa čiăng ba êa truh kơ mnuih ƀuôn sang.”

Bi kơ klei amâo mâo djăp êa yua ti yan bhăng ti să Dak R’la mơ̆ng lu thŭn leh êgao. Mnuih ƀuôn sang lehanăn knŭk kna ăt hmăng hmưi kơ dŭm gưl, dhar bruă dưi đru prăk kăk čiăng mnuih ƀuôn sang dưi mâo êa yua grăp hruê leh năn krih kơ ana boh kroh.