VOV4.Êđê- Hruê 21/4, dhar bruă ruah khua čar Dak Nông mkŏ mjing leh klei bi kƀĭn tal 3 čiăng čih yap dŭm bruă ngă mprăp kơ klei ruah pô bi ala Quốc Hội gưl 15 lehanăn HĐND dŭm gưl wưng thŭn 2021-2026. Tui hlue dhar bruă ruah khua čar Dak Nông, truh kơ ară anei dŭm alŭ wăl mkŏ mkra leh bruă ruah khua djŏ hŏng hdră bhiăn ala čar, mặt trận čar kwar dŭm gưl ăt mâo leh klei bi kƀĭn phung khua êmua tal 3, bi klă hră anăn phung mgơ̆ng asei hŏng klă klơ̆ng lehanăn ênŭm.

Tui hlue boh tŭ dưn mơ̆ng klei bi kƀĭn phung khua êmua hlăm čar mâo: 10 čô pô mgơ̆ng asei ngă pô bi ala Quốc Hội, HĐND gưl čar mâo 88 čô, HĐND gưl kdriêk mâo 452 čô mgơ̆ng asei lehanăn 2.960 čô mgơ̆ng asei ti gưl să. Mâo 680 êpul mkŏ mjing klei ruah khua ti alŭ wăl čar dưi bi klă leh hră anăn lehanăn anôk mplĕ hră hŏng ênoh 410.659 čô nao mplĕ hră. Hlăm klei bi trông, dhar bruă ruah khua čar Dak Nông tŭ ư leh hră anăn phung mgơ̆ng asei ngă pô bi ala Quốc Hội leh gưl 15 leh anăn HĐND čar wưng thŭn 2021-2026 čiăng bi mbha kơ dŭm anôk bruă ruah khua.

Pô mblang: Y-Khem Niê