VOV4.Êđê- Knơ̆ng bruă rŭ mdơ̆ng Dak Nông gĭt gai bi hgŭm hŏng Knơ̆ng bruă êpul grup T&T leh anăn khua gĭt gai  Knơ̆ng bruă sang čư̆ êa ƀuôn prŏng Gia Nghiã mkŏ mjing knăm hưn mdah hdră čăl krĭng wăl ƀuôn prŏng hiu čhưn ênguê ênao êa Dak Rtih. Hluê anăn, Hdră bruă  anei mâo ênhă êbeh 1.715 ha mâo kdrêč lăn hlăm dŭm ƀuôn hgŭm Quảng Thành, Nghĩa Phú, să Dak R'Moan leh anăn kdrêč êa knơ̆ng kdơ̆ng êa Dak Rtih hlăm să Dak Rmian, ƀuôn prŏng Gia Nghiã.

Hdră bruă dưi mbha 7 wăl ngă bruă, klei rŭ mdơ̆ng dưi mkŏ mjing ti dŭm anôk găl ênưih kơ êlan klông mâo êlan dơ̆ng phŭn mkŏ hŏng dŭm wăl bruă mkăn ti ƀuôn prŏng. Êngao anăn, hdră bruă ăt srăng mkŏ mjing dŭm hdră bruă nah gŭ phŭn, dŭm wăl mdei msăn, hdră bruă êpul êya mguôp hŏng wăl hdĭp mda mtah, jiă kma dhar kreh jăk siam mơ̆ng djuê ƀiă ti alŭ wăl.

Pô mblang: H’Zawut Ƀuôn Yă