VOV4.Êđê- Hruê 28/4, Đại tá Nguyễn Văn Lư, khua gĭt gai êpul lĭng kahan knông lăn čar Dak Nông brei thâo, kđông kahan Knông lăn Dak Tiên, kdriêk Dak Song mrâo hmao ƀuh leh anăn mă kơ̆ng 2 čô mnuih găn knông lăn soh hŏng hdră bhiăn ti knông lăn Việt Nam - Campuchia. Hlăm ƀrô 10 mmông mmăt hruê 27/4, ti gơ̆ng knông lăn 52/3, hlăm klei nao ksiêm dlăng ti anôk knông lăn, dŭm čô lĭng kahan ti knông lăn Dak Tiên hmao ƀuh 2 čô jing Lê Văn Biều leh anăn Lê Sơn Điền mâo gŏ êsei ti să Thuận Hạnh, kdriêk Dak Song găn knông lăn soh hŏng hdră bhiăn čiăng hiu lua hlô dliê.

Êpul lĭng kahan knông lăn ngă leh hră mơar leh anăn ba jao dua čô anei kơ anôk bruă mdrao mgŭn čar dak Nông dưi ba bi ktlah 14 hruê djŏ hŏng hdră bhiăn, leh anăn bi êdah kơ kahan ksiêm kdriêk Dak Song srăng kčŭt hưn bruă ngă soh jhat tui hluê klei bhiăn ala čar.

Pô mblang: Y-Khem Niê