VOV4.Êđê - Ti anăp klei ruă tưp Covid-19 dleh ktuê dlăng ti Campuchia, Êpul kahan răng mgang knông lăn čar Dak Nông leh anăn dŭm êpul bruă djŏ tuôm hyuă kjăp hdră mjêč, ksiêm dlăng krĭng wăl knông lăn, amâo brei mâo klei mŭt, kbiă, găn knông lăn soh hdră bhiăn ngă tưp lar klei ruă tưp.

Čar Dak Nông mâo knông lăn hŏng boh taih 141km knông hŏng čar Mondulkiri, ala čar Campuchia, jing anôk mâo klei čih yap hŏng dŭm čô mâo klei ruă tưp Covid-19 hlăm yang ƀuôn. Đại tá Phan Quý Vỹ, k’iăng khua bruă kđi čar anôk gĭt gai lĭng kahan knông lăn čar Dak Nông brei thâo, ti anăp klei dleh dưi ksiêm dlăng mơ̆ng klei ruă tưp Covid-19 ti ala čar Campuchia, mâo lui ôh klei hyưt dŭm čô mnuih ƀuôn sang Việt Nam ti Campuchia srăng găn knông lăn wĭt kơ ala čar čiăng dêč đuê̆ kơ klei ruă tưp. Kyuanăn, knơ̆ng bruă gĭt gai lĭng kahan čar Dak Nông mâo leh klei iêu mthưr kơ phung knuă druh, lĭnh kahan hlăm 12 kđông kahan knông lăn amâo dưi ngă ngơi mang, luič klei răng, mđĭ hĭn bruă hiu ksiêm dlăng hlăm alŭ wăl ƀăng jang knông lăn, êlan điêt, lehanăn êlan pŏk. “Čiăng hmao gang mkhư̆ klei ruă tưp, êpul lĭng kahan knông lăn rŭ mdơ̆ng leh 25 êpul gak tuê knông lăn lehanăn dŭm êpul êya hiu ksiêm dlăng dŭm êlan điêt, dŭm alŭ wăl kreh mâo mnuih găn knông lăn soh hŏng hdră bhiăn. Hmei tui ngă djŏ hŏng săp mtrŭn mơ̆ng gưl nah dlông, phŭn bruă lĭng kahan lehanăn bruă sang čư êa čar Dak Nông kơ bruă bi mdrơ̆ng lehanăn gang mkhư̆ klei ruă tưp Covid-19. Amâo brei mnuih găn knông lăn soh hŏng hdră bhiăn hlăm alŭ wăl lehanăn êngao alŭ wăl. Mbĭt hŏng anăn hmei lŏ ngă jăk dŭm hdră êlan hlăm bruă hâo hưn, mtrŭt mjhar kơ mnuih ƀuôn sang tui ngă djŏ dŭm hdră êlan hlăm bruă gang mkhư̆ klei ruă tưp, nao hgŭm hlăm dŭm bruă čiăng hmao ƀuh phung ngă soh jhat msĕ si găn knông lăn soh hŏng hdră bhiăn lehanăn dưi hmao mgaih msir hnưm.

Mbĭt hŏng bruă dưi rơ̆ng 100% ênoh lĭng kahan hlăm dŭm kđông kahan knông lăn. Knơ̆ng bruă gĭt gai lĭng kahan čar Dak Nông mâo leh klei akâo kơ knơ̆ng bruă gĭt gai lĭng kahan čar Dak Nông lŏ brei nao thiăm phung knuă druh, lĭng kahan mơ̆ng dŭm êpul lĭng kahan prŏng truh kơ tuê knông lăn čiăng đru kơ bruă gang mkhư̆ klei ruă tưp. Lehanăn mâo săp mtrŭn kơ dŭm să ti knông lăn lŏ mđĭ hĭn êpul kahan mkăp mơ̆ng mnuih ƀuôn sang kơ dŭm kđông kahan hlăm bruă bi mdrơ̆ng lehanăn gang mkhư̆ klei ruă Covid-19.

Mbĭt hŏng êpul lĭng kahan, dhar bruă mdrao mgŭn čar Dak Nông ăt mâo leh klei tiŏ nao knuă druh truh kơ dŭm anôk ksiêm dlăng knông lăn hŏng klei čiăng “gang mkhư̆ jih ai tiê, hmao ƀuh hnưm, bi ktlah hmar, mdrao hlao, hmar mâo klei êđăp ênang”. Hà Văn Hùng, k’iăng khua knơ̆ng bruă mdrao mgŭn čar Dak Nông brei thâo, ară anei amâo 100 čô aê mdrao, nao mdrao bi mlih hŏng dŭm čô knuă druh, lĭng kahan knông lăn hlăm bruă gang mkhư̆ klei ruă tưp srăng mŭt găn knông lăn. Tơdah ƀuh phung găn knông lăn soh hŏng hdră bhiăn srăng ba bi ktlah djŏ hŏng hdră bhiăn “Ară anei ti čar Dak Nông ka mâo ôh klei čih yap mâo mnuih djŏ hŏng klei ruă, ƀiădah amâo dưi mâo klei ngă ngơi mang, luič klei răng, dŭm anôk bruă mâo nanao klei nao ksiêm dlăng, mkŏ mkra lehanăn tui ngă dŭm hdră êlan bruă mdrao mgŭn. Dhar bruă mdrao mgŭm hrăm mbĭt hŏng dŭm knơ̆ng, dhar bruă kăm ghă klei dôk lu mnuih čiăng gang mkhư̆ phung mnuih mơ̆ng ala čar Campuchia wĭt kơ ala čar Việt Nam. Ară anei mâo hlăm ƀrô 200 čô mnuih, hlăm anăn mâo wăt phung mă bruă mdrao mgŭn lehanăn lĭng kahan dôk ksiêm dlăng wăt kơ yang hruê lehanăn mmăt mlam hlăm dŭm anôk ksiêm dlăng huĭdah mâo mnuih găn knông lăn soh hŏng hdră bhiăn. Bi kơ êpul êya thơ̆ng kơ bruă mdrao mgŭn, hmei mă yua dŭm čô hlăm alŭ wăl, sitôhmô dŭm anôk gak dlăng ti kdriêk Čư̆ Jŭt srăng yua êpul bruă mdrao mgŭn Čư̆ Jŭt, driêk Dak Mil srăng yua êpul bruă mdrao mgŭn Dak Mil. Bi kơ 2 ƀăng jang knông lăn srăng tiŏ nao êpul ksiêm dlăng klei ruă tưp čar Dak Nông nao đru.”

Êlâo kơ năn, čar Dak Nông mâo leh hră mtrŭn kơ dŭm knơ̆ng, dhar bruă, dŭm êpul êya, êpul răng mgang klei êđăp ênang, dŭm alŭ wăl amâo dưi mâo klei ngă ngơi mang, luič klei răng hlăm bruă mdrơ̆ng lehanăn gang mkhư̆ klei ruă tưp, bi hrŏ dŭm bruă ngă mâo lu mnuih. Tui ngă jăk dŭm hdră êlan čiăng rơ̆ng kơ klei êđăp ênang, guôm bô̆ mta hŏng čhiăm guôm ƀô̆, rao kiê kngan hŏng êa mdjiê kman… Djŏ hŏng hdră êlan. Dŭm êpul êya hlăm bruă ksiêm dlăng bruă mŭt kbiă, bi ktlah, ksiêm dlăng bruă mdrao mgŭn srăng mprăp ênŭm mnơ̆ng dhơ̆ng yua, mâo klei mprăp srăng tŭ jum dŭm čô mnuih mŭt hlăm ala čar djŏ hŏng hdră bhiăn hlăm ênuk klei ruă tưp ƀiădah srăng rơ̆ng kơ klei êđăp ênang.