VOV4.Êđê- Hruê 9/4, bruă sang čư̆ êa čar Dak Nông mkŏ mjing leh sa klei bi kƀĭn čiăng hmư̆ leh anăn bi trông kơ dŭm hdră êlan čiăñg mgaih msir dŭm klei dleh dlan, kpăk êgun hlăm dŭm bruă hui čhưn ênguê čŏng mâo ti alŭ wăl Ta Đung (Dak Glong). Alŭ wăl Ta Đung jing sa anôk hiu čhưn ênguê dưi yap jing dhar kreh đưm mơ̆ng kdrăn băng k’ưp čư̆ pui UNESCO Dak Nông. Anei jing anôk mâo klei siam, dưi mâo lu klei duh bi liê mơ̆ng dŭm čô hlăm bruă duah bi liê, leh anăn ênoh tuê hriê hiu čhưn ênguê kơ anôk anei ƀrư̆ hruê brư̆ đĭ. Dŭm anôk bruă mnia blei ti Ta Đung ară anei jing dŭm sang mnia blei điêt brei kơ tuê dlăng, dôk êjai leh anăn huă mnăm. Dŭm anôk mdei êjai jing dŭm boh sang pưk điêt, ênưh điêt, kdrăp yua dôk ƀiă. Blŭ ti klei bi kƀĭn Nguyễn Đình Trung - khua bruă sang čư̆ êa čar Dak Nông lač, hlăm hruê mmông leh êgao, Ta Đung dưi thâo jing nôk mâo klei siam, khă dah bruă ƀư̆ mkra, ksiêm dlăng dŭm bruă hiu čhưn ênguê ti nei ka mâo klei hơĭt ôh. kyuanăn, bruă sang čư̆ êa ti alŭ wăl, dŭm knơ̆ng bruă ciăng lŏ mâo klei hyuă kjăp bruă ksiêm dlăng lăn ala, rŭ mdơ̆ng leh anăn răng mgang klei êđăp êang hlăm alŭ wăl.

Pô mblang: Y-Khem Niê