VOV4.Êđê - Knŏng dôk 2 hruê kăm, hruê m’ak jih jang mnuih ƀuôn sang nao mplĕ hră ruah pô bi ala Quốc hội gưl XV lehanăn HĐND dŭm gưl wưng thŭn 2021 – 2026 srăng dưi mkŏ mjing. Ti Dak Nông, hdră mprăp kơ gưl ruah khua dưi hluê ngă djăp ênŭm.

Hluê si Dhar bruă ruah khua čar Dak Nông, hlăm wưng thŭn 2021 – 2026 čar Dak Nông mâo 10 čô mgơ̆ng ruah ngă pô bi ala Quốc hội gưl XV, hlăm anăn mâo 2 čô gưl dlông hưn mthâo, dưi kah mbha, hưn mthâo wĭt mtrŭt mjhar hdră mgơ̆ng ruah ti 2 êpul êya ruah khua. 88 čô mgơ̆ng ruah ngă pô bi ala HĐND čar gưl IV dưi kah mbha, hưn mthâo wĭt mtrŭt mjhar hdră mgơ̆ng ruah ti 14 êpul êya ruah khua. Truh ară anei, ti čar Dak Nông bruă ksiêm dlăng, bi mklă anăn phung bi ala mâo leh alŭ wăl dôk mjêč hluê ngă. Êbeh 410 êbâo čô mnuih ƀuôn sang mprăp nao ruah khua hŏng klei čang hmăng pŏk hră mplĕ mơ̆ng pô srăng dưi ruah mnuih bi ala mâo klei thâo, mâo knhuah hdĭp jăk./.

H’Nêč pô mblang