VOV4.Êđê - Ƀri bi hdơr 131 thŭn hruê kkiêng kơ Khua gĭt gai Hồ Chí Minh, aguah hruê 19/5, ti să Dak Nia, ƀuôn prŏng Gia Nghĩa, anôk bruă sang čư̆ êa čar Dak Nông mkŏ mjing leh Knăm mtrŭt mjhar Têt pla kyâo hdơr nanao kơ Awa Hô thŭn 2021. Ti knăm mtrŭt mjhar, phung khua kiă kriê čar Dak Nông iêu mthưr grăp čô knuă druh, mnuih mă bruă, lĭng kahan lehanăn mnuih ƀuôn sang pla ƀiă êdi 1 phŭn ana kyâo, mđing truh kơ hruê pla kyâo hluê si asăp Awa mtă kñăm răng mgang wăl hdĭp mda, klei mtah mda krĭng ƀuôn prŏng.

Leh knăm anei, 350 ƀĕ ana dầu lehanăn ana truôl mâo pla leh ti Wăl ngă bruă lŏ hma ba yua kdrăp mrâo ti să Dak Nia, ƀuôn prŏng Gia Nghiã. Hlăm gưl anei, dŭm alŭ wăl hlăm čar ăt ba pla hlăm brô 51 êbâo phŭn ana kyâo. Lê Trọng Yên, K’iăng khua anôk bruă sang čư̆ êa čar Dak Nông brei thâo, ti čar Dak Nông, dliê ƀrư̆ hruê ƀrư̆ hrŏ wăt kơ ênhă lehanăn hnơ̆ng tŭ jăk. Anôk bruă sang čư̆ êa čar čang hmăng dŭm anôk bruă, êpul êya lehanăn mnuih ƀuôn sang mđĭ klei thâo săng răng mgang wăl hdĭp mda, gĭr pla ana kyâo, răng mgang dliê, mđĭ hnơ̆ng tŭ wăl hdĭp mda./.

H Nêč pô mblang