VOV4.Êđê- Hruê 20/5, ti msat phung lĭng kahan êngiă asei kdriêk Dak R’Lấp, čar Dak Nông, knơ̆ng bruă gĭt gai lĭng kahan čar, dŭm čô kahan hđăp hlăm Trung Đoàn 271 lehanăn knơ̆ng bruă gĭt gai lĭng kahan kdriêk Tuy Đức mkŏ mjing leh knăm bi hdơr, ba dơr klang 9 čô êngiă asei. Leh 3 hruê êgao, dŭm čô kahan hđăp hlăm Trung Đoàn 271 lehanăn knơ̆ng bruă gĭt gai lĭng kahan kdriêk Tuy Đức tui duah lehanăn ƀuh klang 9 čô êngiă asei ti alŭ 8, să Quảng Tân, kdiêk Tuy Đức.

Hlăm anăn mâo 3 boh msat dôk klang lehanăn dŭm boh msat mkan dôk knŏng mơ̆ng yua msĕ si: giêt êa, mnal đŭng, klei čih anăn, giêt binixilin, awak… Hlăm dŭm hră mơar dôk mâo brei ƀuh dŭm čô êngiă asei anei jing dŭm čô lĭng kahan hlăm Trung đoàn 271 lehanăn Trung đoàn 205 (anôk gĭt gai lĭng kahan krĭng kwar dhŭng). Anei jing klei tui duah, ba dơr tal 4 ti alŭ wăl alŭ 8, să Quảng Tân lehanăn dưi ƀuh klang 29 čô êngiă asei. Hlăm knăm anăn, khua gĭt gai hlăm alŭ wăl, êpul răng mgang klei êđăp ênang lehanăn mnuih ƀuôn sang ti 2 kdriêk Đắk R’Lấp lehanăn Tuy Đức ngă leh klei myơr mnga, čuh ñang čiăng bi hdơr kơ dŭm čô êngiă asei anei.

\Pô mblang: Y-Khem Niê