VOV4.Êđê - Mrâo êgao, anôk bruă pui kmlă Dak Nông pral msir mghaih 2 klei truh hlăm êlan pui kmlă, rơ̆ng kjăp bruă mkăp pui kmlă kơ mnuih yua. Klă klơ̆ng, hlăm yang hruê dơ̆ng hruê 10/5, sa gưl angĭn đrŭng ngă kpŏk čuôr sang mnuih ƀuôn sang lehanăn ana kyâo êbuh hlăm êlan pui kmlă, ngă luič pui kmlă ti alŭ wăl să Nhân Đạo, kdriêk Dak Rlâp. Hmư̆ klei hưn, mnuih mă bruă Anôk bruă pui kmlă Dak Rlâp ba leh êdeh ktŭng mbĭt hŏng kdrăp mnơ̆ng nao msir mghaih klei truh, lŏ mkăp pui kmlă kơ mnuih ƀuôn sang hlăm 3h tlam hruê anăn.

Êlâo anăn, hlăk 10h hruê 4/5, ti êlan mlir kdriêk Dak Song – Tuy Đức, sa boh êdeh mdiăng mnơ̆ng êgao hnơ̆ng tlă leh hlăm klei pui ngă joh gơ̆ng pui lehanăn Anôk mđĭ trŭn pui kmlă T70. Klei truh anei ngă kơ bruă mkăp pui kmlă kơ êbeh 5.200 čô yua pui hmăi djŏ. Kyua anăn, anôk bruă pui kmlă Dak Song ba nao leh êpul mnuih mă bruă, kdrăp mnơ̆ng pral nao msir mghaih. Truh 1h tlam hruê anăn, êpul ngă bruă dưi msir mghaih jih, lŏ mkăp pui kmlă kơ mnuih ƀuôn sang./.

H Nêč pô mblang