VOV4.Êđê - Truh ară anei êbeh 140 čô mnuih,  hlăm 47 gŏ êsei ti 189/1 Mai Hắc Đế, ƀuôn hgŭm Tân Thành, ƀuôn prŏng Ƀuôn Ama Thuôt, čar Dak Lak ăt dôk hlăm klei kwang dar kyua mâo 2 čô ruă Covid-19. Mnuih ƀuôn sang ti nei mâo lu klei mđing dlăng mơ̆ng găp djuê leh anăn lu êpul bruă ala ƀuôn. Klŭng braih, boh bip, boh kroh djam tam dưi ba nao, đru digơ̆ hơĭt ai tiê mbĭt hŏng bruă sang čư̆ êa alŭ wăl msưh kdŭn klei ruă tưp.

Mâo mă mnơ̆ng đru ti alŭ wăl dôk hlăm klei kwang dar kăm mkhư̆, amai Nguyễn Thị Lý mưn dôk ti sang mrô 189/1 êlan Mai Hắc Đế lač, amai hriê mơ̆ng kdriêk Êa Kar truh ti ƀuôn prŏng Ƀuôn Ama Thuôt mưn sang dôk čiăng pŏk anôk săm kčoh asei mlei. Mâo hrui wĭt hlăm grăp hruê knŏng djăp yua kơ klei hdĭp dua amĭ anak, lehanăn tla prăk mưn sang hlăm grăp mlan. Mlan hrue 8/5 leh hmư̆ hing hlăm êlan điêt sang pô dôk anei mâo hĕ mnuih djŏ kman klei ruă tưp covid 19, snăn ñu kdjăt kƀla rŭng răng mơh. Siămdah, leh mâo knuă druh alŭ wăl hâo hưn kơ bruă bi hlue gưt djăp mta mtrŭn kơ bruă mdrơ̆ng hŏng klei ruă tưp, amai ƀuh hơĭt ai tiê mơh, lehanăn čang hmăng kơ klei ruă tưp anei srăng dưi ksiêm dlăng. Hlăm dŭm hrue dôk tŭ klei “kwang dar kăm mkhư̆”, amai mđing hluê ngă ênŭm ya mta mtrŭn kơ bruă mdrơ̆ng hŏng klei ruă tưp, kñăm dưi răng mgang kơ asei mlei pô lehanăn kơ jih jang mnuih mkăn. Khădah amâo lŏ dưi mă bruă msĕ si dŭm hrue êlâo ôh, mâo klei đru mơ̆ng dŭm êpul bruă, lehanăn mnuih, mbĭt hŏng bruă sang čư̆ êa alŭ wăl, snăn klei hdĭp grăp hrue mơ̆ng dua amĭ anak ñu ăt hơĭt, amâo mâo hyưt kơ klei kƀah mnơ̆ng ƀơ̆ng huă hlăm grăp hrue ôh.“Wưng bi kčah dôk ngă klei bi ktlah anei hlăm brô 21 hrue, snăn hmei ăt tuôm hŏng lu klei dleh dlan mơh, ƀiădah mâo bruă sang čư̆ êa đru leh djăp mta. Hmei mâo tŭ mă êsei, braih, lehanăn lu mta mnơ̆ng ƀơ̆ng mkăn”.

Hlăm ênoh 47 gŏ êsei hdĭp hlăm klông điêt mrô 189/1 êlan Mai Hắc Đế, mâo 20 gŏ êsei, hŏng 47 čô mnuih – jing dŭm gŏ êsei jưh dôk hlăm sang mưn, hlăm 4 pruĕ sang mưn. Lu hlăm ênoh phung anăn duah bruă knuă mă amâo mâo hơĭt ôh, ênoh prăk mâo ba wĭt ăt kăn hơĭt rei, kyuanăn klei hdĭp lĕ hlăm klei dleh dlan. Anôk tuôm hŏng klei kwang dar kăm mkhư̆ pioh mdrơ̆ng hŏng klei ruă tưp, jing mđrĭng hŏng klei amâo lŏ dưi nao mă bruă knuă ôh, amâo mâo prăk kơ klei hdĭp mda hlăm grăp hrue. Kyua anăn, hŏng digơ̆ sa anŭng điŏ aguah, thâodah ya mta mnơ̆ng yua aguah tlam, mơ̆ng phung thâo bi đru mơĭt jing yuôm bhăn êdi hlăm mmông anei. Aduôn Đặng Thị Liệu, mnuih mưn dôk hlăm alŭ wăl djŏ anôk kwang dar kăm mkhư̆ anăn lač, 3 hrue hŏng anei, mâo alŭ wăl đru, gŏ sang kâo amâo mâo hyưt kơ kƀah mnơ̆ng ƀơ̆ng huă ôh hlăm grăp hrue. Ñu ƀuh hơĭt ai tiê hŏng jih jang klei thâo bi khăp, bi đru mơ̆ng mnuih riêng gah hŏng phung dôk hlăm anôk kăm mkhư̆: “Kyua mâo lu mnuih thâo bi đru, dŭm êpul êya, bruă sang čư̆ êa đru leh čiăng kơ hmei dưi găn ti mmông dleh dlan anei. Hmei amâo mâo bruă d\i lŏ bi wĭt ôh, knŏng lač jăk lu kơ jih jang”.

Yap truh hrue 15/5, Knơ̆ng bruă sang čư̆ êa ƀuôn hgŭm Tân Thành mâo tŭ mă leh truh 30 êklăk prăk, 300kg braih, 100 huôm ƀung hdang krô, êbeh 200kg djam mtam, lehanăn lu mnơ̆ng yua mkăn. Amai Vũ Thị Mai Tuyên, Khua êpul bruă mniê êpul anôk dôk mrô 10, ƀuôn hgŭm Tân Thành lač, mơ̆ng mnơ̆ng bi đru phung mâo ai tiê thâo khăp mđup myơr, hlăm dŭm hrue êgao Êpul hgŭm mâo bi mguôp leh hŏng knơ̆ng bruă sang čư̆ êa, lehanăn dŭm êpul êya bruă hlăm ƀuôn hgŭm Tân Thành nao ba leh truh kơ kngan phung dôk hlăm anôk kăm mkhư̆. Tui hlue hŏng ênoh mnơ̆ng mâo, Êpul hgŭm tiŏ nao phung ngă bruă ba anăp bi mbha, dưm hlăm kpŭng mdê mdê jao kơ mnuih dôk hlăm anôk bi ktlah. Hŏng dŭm mta djam mtam mtah hla rơ̆k ktơ̆k, boh kroh hlŏng nao ba mtam, bi mnơ̆ng mkăn dưi pioh sui snăn lŏ bi mbha ksiêk čiăng bi knar:“Truh kơ ară anei jih jang dŭm gŏ êsei dôk hlăm anôk bi ktlah ăt hơĭt klei hdĭp mda. Hŏng wưng bi kčah hlăm 21 hrue, čiăng snăk mâo klei thâo bi đru mơ̆ng jih jang mnuih, hrăm mbĭt hŏng ayŏng amai adei dôk hlăm anôk bi ktlah klông điêt mrô 189 anăn. Hŏng bruă klam pô jing amâo mâo čiăng ôh kơ sa gŏ êsei kƀah hĕ êsei huă, lehanăn mnơ̆ng ƀơ̆ng, lehanăn mnơ̆ng yua hlăm grăp hrue”.

Mâo klei mđing uêñ mơ̆ng bruă sang čư̆ êa, klei sa ai mơ̆ng jih jang phung thâo bi đru, mâo đru leh kơ phung dôk hlăm anôk bi ktlah dưi găn jih klei dleh dlan hlăm kklei hdĭp, lehanăn hrăm mbĭt ai tiê msưh kdŭn klei ruă tưp anei./.