VOV4.Êđê - Ti Daklak, hlăm dŭm bruă ngă čiăng kkuh mơak hrue ruah khua phung bi ala Quốc hội gưl 15, lehanăn Hội Đồng nhân dân djăp gưl wưng păn bruă 2021 – 2026, sang dăp pioh ngăn drăp čar Daklak mrâo pŏk leh klei rang mdah hŏng anăn: “hrue lăn ala êa djuh”. klei rang mdah anei mâo 3 mta phŭn kñăm jing: Awa Hô hŏng Quốc hội Việt Nam; Gru kruak Quốc hội Việt Nam; Dŭm bruă êdah êdi mơ̆ng Êpul bi ala Quốc hội lehanăn Hội Đồng nhân dân djăp gưl čar Daklak.

Mâo hlăm brô 130 pŏk rup lač kơ dŭm boh tŭ dưn mơ̆ng Quốc hội lehanăn Hội đồng nhân dân djăp gưl mâo leh, hlăm anăn mâo wăt êpul bi ala Quốc hội lehanăn Hội đồng nhân dân djăp gưl čar Daklak găn hlăm djăp ênuk, êdah klă klei lŏ čuê, lehanăn mđĭ bi lar ai tiê mlih mrâo mơ̆ng Quốc hội hlăm bruă mkŏ mjing hdră bhiăn, bruă ksiêm dlăng, lehanăn bi klă djăp mta bruă prŏng kơ lăn čar, klei bi êdah bruă klam mơ̆ng sa anôk bruă mâo klei dưi hĭn mơ̆ng knŭk kna djŏ hŏng hdră êlan mơ̆ng Đảng, hdră bhiăn knŭk kna./.

            Y Khem pô mblang