VOV4.Êđê- Leh sa wưng ngă klei bi ktlah gang mkhư̆ klei ruă tưp covid 19, čar Daknông brei leh klei dưi lŏ wĭt pŏk ƀăng jih jang bruă anôk lu mnuih, msĕ si knăm mơak, klei bi kƀĭn dhar kreh, mjuăt asei mlei. Mbĭt hŏng anăn čar mâo klei mtă ăt ngă bi kjăp bruă mdrơ̆ng hŏng klei ruă tưp, mdrơ̆ng hŏng djăp klei amâo mâo jăk truh. Tui si knơ̆ng bruă sang čư̆ êa čar Daknông, bruă brei lŏ wĭt pŏk ƀăng jih jang anôk lu mnuih kyua bruă mdrơ̆ng hŏng klei ruă tưp ti alŭ wăl dưi ksiêm dlăng leh. Čiăng rơ̆ng kơ bruă mâo klei êđăp ênang sĭt hlăm bruă mdrơ̆ng hŏng klei ruă tưp, knơ̆ng bruă sang čư̆ êa čar mtă kơ dhar bruă hiu čhưn ênguê pŏk êjai jih jang bruă hiu čhưn ênguê lehanăn ngă mơh bruă mdrơ̆ng hŏng klei ruă tưp. Êngao anăn, Daknông mtă kơ mnuih ƀuôn sang ăt truă čhiăm guôm ƀô̆ tơdah kbiă mơ̆ng sang, nao hlăm anôk lu mnuih, đĭ hlăm êdeh êdâo, rao kngan jêñ jêñ hŏng kbu amâodah hŏng êa rao mdjiê kman, dôk bi kbưi êjai bi tuôm hŏng mnuih mkăn./.

Pô mblang: Y-Khem Niê