VOV4.Êđê- Tui si Êpul khua kiă kriê bruă mặt trận čar Daknông, hlăm ênoh 96 čô mnuih mâo ba mgơ̆ng ruah pô bi ala HĐND čar gưl 4, wưng păn bruă 2021 – 2026 mâo 36 čô jing pô bi ala HĐND čar gưl 3; mâo 42 čô mniê, 36 čô mda thŭn; 21 čô jing mnuih djuê ƀiă; 10 čô mnuih êngao Đảng, 10 čô mnuih mâo klei đăo mdê mdê. Jih jang ênoh mrâo lač anăn jing kdlư̆n hĭn hŏng ênoh kdrêč êtuh mkă hŏng klei čoh čuăn, lehanăn jih jang phung ba mgơ̆ng ruah anei djăp sơăi ênoh čuăn pioh ruah jing pô bi ala HĐND čar gưl 4, wưng păn bruă 2021 - 2026. Truh kơ ară anei, jih jang 96 čô mnuih ka mâo ôh hră kčŭt. Tui si ênoh čuăn, leh mâo ênoh mnuih ba mgơ̆ng, dhar bruă mặt trânj djăp alŭ wăl mkŏ mjing klei bi kƀĭn bi tuôm hŏng phung ƀuôn sang anôk pô mdơ̆ng ruah dôk. Tơdah pô mgơ̆ng ruah amâo mâo djăp ôh 50% ênoh hră mplĕ mơ̆ng phung bi ala anôk ñu dôk anăn, snăn srăng ksiêk ñu đuĕ mơ̆ng ênoh mgơ̆ng ruah./.

Pô mblang: Y-Khem Niê