VOV4.Êđê- Hlăm tlam hruê 27/4, ti gŭ klei gĭt gai mơ̆ng Khua Quốc hội Vương Đình Huệ, Khua hlăm Dhar bruă gĭt gai Quốc hội bi mklă leh klei ba mdah mơ̆ng Knŭk kna, dưi brei ba yua 12,1 êbâo êklai prăk mkiêt mkriêm bi liê mơ̆ng ngăn prăk knŭk kna gưl dlông čiăng blei vaccine gang mkhư̆ Covid 19. Bruă ba yua mphŭn mkăp prăk anei čiăng blei vaccine gang mkhư̆ Covid 19 jing klei čiăng mjêč êdi, rơ̆ng hluê ngă jăk hdră đru kơ yang ƀuôn hluê si klei kčah mtrŭn ti Hdră bhiăn ngăn prăk knŭk kna. Knŭk kna tĭng dlăng leh phŭn mkăp prăk lehanăn ênoh bi liê djŏ guôp. Khă snăn, Dhar bruă gĭt gai Quốc hội ăt mtă brei đru kơ dŭm alŭ wăl dleh dlan hlăm bruă ba yua bi knar ngăn prăk knŭk kna djŏ guôp hŏng hdră blei lehanăn ba yua vaccine. Blŭ hrăm ti knăm mjưh ruê̆ Klei bi kƀĭn tal 55, Khua Quốc hội Vương Đình Huệ mtă kơ anôk bruă djŏ tuôm mprăp djăp ênŭm hdră hưn mdah ti Klei bi kƀĭn tal 1, Quốc hội gưl 15. Tĭng klei bi kƀĭn tal 1, Quốc hội gưl 15 srăng mă bruă hlăm 11 hruê; mphŭn pŏk hlăm hruê 20/7 lehanăn mjưh ruê̆ hlăm hruê 3/8. Ti klei bi kƀĭn anei, Quốc hội srăng pioh lu mmông čiăng ksiêm dlăng, bi mklă hdră bruă knuă druh./.

                                                    Pô mblang: H’Nêč Êñuôl