VOV4.Êđê- Hlăm tlam 15/3, Dhar bruă Quốc hôị brei klei blŭ kơ klei hâo hưn klei tŭ ktuê dlăng bruă msir mgaih klei akâo mơ̆ng phung bi ala kơ mnuih ƀuôn sang  kơ klei bi kƀĭn tal 10, Quốc hội gưl 14, hâo hưn klei blŭ mguôp, klei akâo mơ̆ng phung bi ala kơ mnuih ƀuôn sang leh anăn yang ƀuôn kơ klei mĭn, klei čang hmăng mơ̆ng phung bi ala kơ mnuih ƀuôn sang jing djŏ guôp, boh sĭt, jing dŭm bruă prŏng mơ̆ng yang ƀuôn mâo mnuih ƀuôn sang leh anăn phung bi ala kơ mnuih ƀuôn sang mđing. Êngao anăn, dŭm klei dưi ngă leh anăn ka dưi mâo Hră čih hâo hưn ăt lač kơ dŭm bruă brei mâo hdră msir tŭ dưn, rơ̆ng kluôm ênŭm, brei lŏ dơ̆ng ktuê dlăng, lač bi nik. Dhar bruă Quốc hôị klă klơ̆ng tŭ ư 5 êpul klei akâo klei kčĕ dưi bi klin, hlăm anăn mâo lu bruă djŏ tuôm kơ bruă pŏk ngă Hdră mtrŭn Klei bi kƀĭn Đảng tal 13. Mprăp leh anăn mkŏ mjing tŭ jing klei ruah khua phung bi ala Quốc hội gưl 15 leh anăn HĐND dŭm gưl wưng thŭn 2021-2026. Klah čŭn klei bi kƀĭn tal 54, Khua Quốc hội Nguyễn Thị Kim Ngân mñă klă: sa mta phŭn yuôm bhăn hĭn jing bruă mnuih mă bruă čiăng bi leh mta bruă gĭt gao hlăm klei bi kƀĭn tal 11, mtă kơ dŭm anôk bruă mprăp bi jăk leh anăn boh nik dŭm hdră hưn mdah, ruah, lui leh anăn bi mklă čiăng rơ̆ng djŏ Hdră bhiăn phŭn leh anăn hdră bhiăn.

Pô mblang: H’Zawut Ƀuôn Yă