VOV4.Êđê - Dhar bruă ruah khua čar Dak Lak mâo Phạm Ngọc Nghị, Khua anôk bruă sang čư̆ êa čar Dak Lak, K’iăng khua dhar bruă ruah khua čar ngă Khua êpul nao ksiêm dlăng leh hdră mprăp kơ klei ruah pô bi ala Quốc hội gưl XV lehanăn bi ala HĐND dŭm gưl, wưng thŭn 2021 – 2026 ti wăl krah Ƀuôn Hô. Hluê si klei hưn mơ̆ng Dhar bruă ruah khua wăl krah Ƀuôn Hô, hdră mprăp kơ gưl ruah khua mâo leh wăl krah gĭt gai, pŏk hluê ngă rơ̆ng djŏ hdră kčah mtrŭn. Dhar bruă ruah khua wăl krah ba mdah leh hdră mtrŭn kơ bruă bi mklă lehanăn hưn mthâo ênoh êpul êya ruah khua, anăn êpul êya ruah khua lehanăn ênoh phung bi ala dưi ruah ti grăp anôk bruă HĐND să, ƀuôn hgŭm...

Blŭ hrăm klah čŭn ti anôk mă bruă, Phạm Ngọc Nghị mtă brei hluê ngă jăk hdră mprăp kơ gưl ruah khua, ksiêm dlăng klă klơ̆ng čiăng kơ hruê ruah khua klă sĭt jing hruê m’ak kơ jih jang mnuih ƀuôn sang. Dhar bruă ruah khua wăl krah Ƀuôn Hô gĭt gai, ktrâo lač kơ Anôk bruă sang čư̆ êa dŭm să, ƀuôn hgŭm mđing pŏk hluê ngă dŭm bruă klam djŏ wưng kčah, ksiêm dlăng djăp ênŭm hdră bruă rơ̆ng kjăp klei êđăp ênang kơ gưl ruah khua, mprăp hdră mdrơ̆ng tơdah bluh mâo klei ruă, klei yan adiê ngă./.

H Nêč pô mblang