Ƀuôn Ia Nueng dôk ti djiêu Knhuah gru lăn mnga êa mak Biển Hồ, ară anei mâo êbeh 200 gŏ êsei hŏng êbeh 1.000 čô mnuih, hlăm anăn mnuih Jarai mâo êbeh 96%. Ƀuôn ăt kriê pioh lu knhuah dhar kreh djuê ana mơ̆ng đưm, sang dlông, sang roong, êpul ana hngô dŭm êtuh thŭn, pin êa mơ̆ng đưm mbĭt hŏng dŭm bruă hrĭ mñam, krah mkra rup, pơ̆k mñam, čing čhar, mnơ̆ng ƀơ̆ng huă.

Hlăm tur knơ̆ng dŭm boh tŭ yuôm dhar kreh, mnơ̆ng dhơ̆ng hiu čhưn ênguê êpul êya ƀuôn Ia Nueng dưi mkŏ mjing jing hdră hiu čhưn dlăng, lông ngă bruă mơ̆ng Biển Hồ, ƀăng jang ƀuôn, sang bi kƀĭn êpul êya, pin êa mơ̆ng đưm, wăl bruă truh kơ dŭm anôk homestay. Hluê si hdră anei, phung tuê dưi tui ksiêm kơ dhar kreh čing čhar, nao hgŭm hlăm klei kdŏ čhuang, lông ngă bruă pơ̆k mñam, hrĭ mñam; nao hgŭm hlăm dŭm bruă ngă lŏ hma msĕ si pla mdiê, wiă mdiê, tăp mdiê, mkra êsei brông. Mŭt hlăm yan kphê, phung tuê dưi lông pĕ, đŭng, kwă leh anăn čŏng pô bi lŭk kphê; mbĭt anăn tui ksiêm kơ mnơ̆ng ƀơ̆ng huă alŭ wăl, mjĕ mjuk hŏng mnuih ƀuôn sang leh anăn tui ksiêm kơ bruă hiu čhưn ênguê ti êpul êya.

Hŏng mnuih ƀuôn sang hlăm ƀuôn, mđĭ kyar bruă hiu čhưn ênguê êpul êya amâo djŏ knŏng pŏk êlan mđĭ hnư hrui wĭt ôh ƀiădah lŏ mjing boh kdrŭt kriê pioh, lŏ čuê bruă djuê ana leh anăn dhar kreh djuê ana kơ phung mda asei. Amai Rơ Lan Han, mnuih ƀuôn sang ƀuôn Ia Nueng brei thâo:

Čang hmăng mnuih ƀuôn sang srăng hrăm mbĭt, bi mguôp đru mđĭ kyar bruă hiu čhưn ênguê êpul êya lu hĭn, kah mbha klei thâo bruă pơ̆k mñam kơ phung mda asei čiăng kơ diñu thâo lu hĭn kơ knhuah dhar kreh. Brei mâo klei mjuăt bi hriăm phung mda asei čiăng jing pô atăt tuê hiu čhưn ênguê čiăng kơ diñu thâo leh anăn hưn mdah kơ knhuah dhar kreh mơ̆ng djuê ana Jarai".

Đặng Khánh Toàn, k’iăng khua Bruă sang čư̆ êa să Biển Hồ brei thâo, alŭ wăl bi klă mnuih ƀuôn sang jing pô phŭn hlăm bruă mkŏ mjing leh anăn mđĭ kyar mnơ̆ng dhơ̆ng hiu čhưn ênguê êpul êya. Hlăm wưng kơ anăp, să Biển Hồ lŏ dơ̆ng bi leh hnơ̆ng tŭ jăk bruă nah gŭ, mđĭ kyar bruă dôk jưh, mnơ̆ng ƀơ̆ng huă, mnơ̆ng dhơ̆ng pơ̆k mñam, bi hgŭm hŏng dŭm anôk bruă hiu čhưn ênguê leh anăn mtrŭt mđĭ hdră hưn mthâo. Mbĭt anăn, bi hgŭm ƀuôn Ia Nueng hŏng dŭm anôk truh msĕ si Biển Hồ, Hàng thông êtuh thŭn, kdrăn kphê leh anăn čư̆ pui Čư̆ Đang Ya, mkŏ mjing dŭm ktuê êlan hiu čhưn ênguê bi hgŭm, đru bi lu jơr mnơ̆ng dhơ̆ng leh anăn mđĭ klei iêo jak kơ bruă hiu čhưn ênguê Gia Lai.

“Ƀuôn hiu čhưn ênguê êpul êya Ia Nueng hmei bi mklă mnuih ƀuôn sang jing pô phŭn mơ̆ng ƀuôn hiu čhưn ênguê êpul êya, pô mnuih ƀuôn sang mjing leh dhar kreh, mnơ̆ng dhơ̆ng lŏ hma doh, tour, êlan hiu čhưn ênguê, kdrăp pĕ tông čiăng mbĭt hŏng Knŭk kna čiăng ba mnơ̆ng dhơ̆ng hiu čhưn ênguê êpul êya truh hŏng phung tuê. Mơ̆ng anăn đru mđĭ hnư hrui wĭt, bi hơĭt klei êđăp ênang bruă kđi čar, klei êđăp ênang yang ƀuôn hlăm ƀuôn, đru mguôp ba Krông Pač ƀrư̆ hruê ƀrư̆ đĭ kyar.”

 Leh knăm hưn mthâo, phung bi ala, mnuih ƀuôn sang leh anăn anôk bruă duh mkra hiu čhưn ênguê nao hlăm hdră tui ksiêm, lông dlăng dŭm wăl anôk dhar kreh leh anăn dŭm hdră bruă êdah êdi hlăm hdră hiu čhưn ênguê êpul êya ti ƀuôn Ia Nueng.