Lŏ hdơr kơ klei bi tuôm hŏng klei kdŏ mmuñ djuê ana, ayŏng Đinh Văn Anging yăl dliê: Êbeh 10 thŭn êlâo, hlăm sa blư̆ nao hgŭm hlăm klei bi mjĕ mjuk, mdah klei kdŏ mmuñ hŏng êpul phung thâo mbruă djuê ana ƀiă să Tơ Tung, ñu myun dưi mâo pô thâo mbruă Đinh Plơnh, khua mduôn Đak Pơkao, mđing dlăng leh anăn jih ai tiê mtô bi hriăm grăp klei kdŏ, grăp ênhiang.

"Mơ̆ng điêt, pô tui hluê aduôn aê amĭ ama nao dlăng knăm mơak, ka mĭn lu ôh. Knŏng thâo dưi hriăm kdrăp pĕ tông jing mơak snăk, snăn pô tŭ ư tui hluê nai mtam. Ênhiang mmuñ Bahnar, ênai čing jing dhar kreh mơ̆ng djuê ana, pô brei hriăm čiăng djă pioh dhar kreh anăn."

Mơ̆ng klei bi tuôm anăn, sa hdră bruă siă suôr hŏng ênhiang mmuñ djuê ana klă klơ̆ng mphŭn kčưm. Ti gŭ klei ktrâo lač mơ̆ng khua mduôn Đinh Plơnh, Đinh Văn Anging ƀrư̆ ƀrư̆ mưng hŏng brô̆ T'rưng, hgơr sơgơr, čing čhar leh anăn dŭm ênhiang mmuñ djuê ana Bahnar. Lu thŭn tui tiŏ klei khăp čiăng, Anging thâo yua êbeh 10 mta kdrăp tông ayŭ djuê ana. Amâo djŏ knŏng mâo klei thâo mdah kdrăp tông ayŭ, ñu lŏ mâo klei mmuñ êdu êun, jiă knhuah krĭng čư̆ dliê Lăn Dap Kngư. Hlăm ênai mmuñ, ênai hgơr, ênai čing mơ̆ng êkei êdam, mnuih hmư̆ msĕ si dưi ƀuh klei hdĭp mơ̆ng ƀuôn sang leh anăn klei khăp kơ dhar kreh djuê ana.

Mơ̆ng dŭm mmông bi mjĕ mjuk kdŏ mmuñ ti ƀuôn sang, Anging ƀrư̆ mâo klei găl nao hgŭm hlăm lu hdră bruă dhar kreh prŏng mơ̆ng čar Gia Lai msĕ si dŭm hdră kdŏ mmuñ kkuh drông thŭn mrâo, hdră hưn mthâo, bi hgŭm bruă hiu čhưn ênguê leh anăn hdră "Čing čhar knhal jih hruê kăm" dưi mkŏ mjing grăp gưl ti Wăl tač prŏng Đại Đoàn Kết, ƀuôn hgŭm Pleiku. Klei bi êdah mơ̆ng êkei êdam Bahnar jŭ, ală mngač hlăm kdrăp čŭt hơô djuê ana, ktang hŏng hgơr ba leh lu klei jăk siam hlăm ai tiê mnuih dlăng.

"Grăp blư̆ dưi mdah kdrăp tông ayŭ djuê ana, pô hơ̆k mơak êdi. Pô mâo atăt phung hđeh hlăm ƀuôn nao mdah tông čing ti knăm drông rup krah Awa Hồ, mdah klei tông čing knhal jih hruê kăm ti kdriêk Kbang (hđăp). Msĕ si jih jang klei khăp mđrăm mbĭt hlăm ênai hgơr, ênai čing, ênai čhar"

Hŏng Đinh Văn Anging, klei hơ̆k mơak amâo djŏ knŏng mdei ti dŭm ênai kwang leh grăp blư̆ mdah. Klei ñu mđing hĭn jing si srăng ngă čiăng kơ ênai čing, klei mmuñ mơ̆ng djuê ana pô lŏ dơ̆ng kwang hlăm klei hdĭp hruê anei leh anăn wăt êdei anăp. Kyua anăn, êngao kơ mmông nao hgŭm hlăm dŭm hdră mdah, ñu pioh lu ai tiê mtô kơ phung hđeh hlăm ƀuôn hriăm mmuñ ênhiang djuê ana, mưng hŏng čing čhar, hgơr, brô̆ T'rưng leh anăn dŭm kdrăp tông ayŭ djuê ana.

"Kâo mđing kơ phung hđeh čiăng hriăm mmuiñ ênhiang djuê ana leh anăn tông čing, kyua lu mnuih bi lač adŭ hđeh ară anei knŏng khăp kơ ênhiang mmuiñ mrâo, đĭng blŭ thâo mĭn, si dưi gĭr dôk hmư̆ ênai čing kwang amâo dah dŭm klei mmuiñ ênhiang djuê ana sui êdi mơ̆ng aduôn aê. Ƀiădah kâo ƀuh phung hđeh hlăm ƀuôn amâo djŏ amâo mâo khăp ôh, knŏng jing diñu ka mâo ôh klei găl dưi mâo arăng ktrâo atăt čiăng thâo săng êlam kơ klei yuôm bhăn mơ̆ng čing čhar leh anăn klei mmuñ ênhiang djuê ana".

Dlăng kơ ƀĭng hriăm điêt hđăp ară anei đĭ hriê kơ prŏng leh, jing leh sa čô mnuih kreh dhar mơ̆ng ƀuôn sang, pô thâo mbruă Đinh Plơnh, khua mduôn Đak Pơkao, să Tơ Tung, čar Gia Lai amâo dưi mdăp ôh klei mgei ai tiê leh anăn ktưn hưn. Hŏng pô nai mâo leh lu thŭn mtô bi hriăm knhuah dhar kreh mơ̆ng djuê ana, klei đĭ hriê kơ prŏng mơ̆ng Đinh Văn Anging amâo djŏ knŏng jing boh tŭ mơ̆ng sa čô hđeh hriăm, ƀiădah lŏ jing klei čang hmăng kơ klei lŏ čuê plah wah dŭm ênuk gưl.

"Kâo mni lač jăk kơ phung anak čô hlăm ƀuôn gĭr hriăm mmuiñ, hriăm tông čing čiăng kơ dhar kreh djuê ana Bahnar amâo luč ram. Leh anăn Anging jing hđeh amâo djŏ knŏng thâo kriê pioh knhuah gru pô, ƀiădah lŏ thâo ba knhuah gru kơ mngač čiăng kơ phung mda asei mkăn ƀuh jăk siam, čiăng tui hriăm. Dŭm ênhiang mmuiñ djuê ana dleh, dŭm ênhiang tông čing brei mâo klei gĭr, ñu dưi hriăm leh anăn lŏ mtô bi hriăm jăk êdi. Msĕ snăn kơh knhuah gru dhar kreh mơ̆ng mnuih Bahnar amâo luč ram ôh"

Mơ̆ng klei khăp dưi rông ba hlăm dŭm yan knăm mơak ƀuôn sang, mơ̆ng klei mtô hŏng jih ai tiê mơ̆ng pô thâo mbruă nao êlâo, Đinh Văn Anging hruê anei dôk lŏ čuê hdră kriê pioh leh anăn mtô bi hriăm dhar kreh Bahnar. Ñu thâo săng, mnơ̆ng kriê pioh knŏng klă sĭt hdĭp tơdah mâo êpul êya mpŭ, hluê ngă leh anăn lŏ čuê. Leh anăn grăp čô hđeh thâo mmuñ sa ênhiang klei muñ djuê ana, thâo tông sa ênai čing jing thiăm sa phŭn kyâo mrâo dưi rông ba ti krĭng lăn dhar kreh mơ̆ng djuê ana pô.