Dŭm ênai čing kwang ti krah čư̆ dliê, dŭm klei kdŏ čhuang jăk jĭn ti djiêu kpur pui ti anăp sang roong, êa kulơr mnga dliê ƀâo mngưi bŏ čư̆ dliê mbĭt hŏng dŭm mta mnơ̆ng pơ̆k mñam mâo lu mta êa kulơr… Jih jang dôk bi mguôp, mjing rup dhar kreh hdĭp mda, bŏ hŏng klei jăk siam.

Festival čing čhar - Hruê kăm mnga Tăng phĭ - Čư̆ pui Čư̆ Đang Ya thŭn 2026 ti Gia Lai mkŏ mjing mơ̆ng hruê 30/10 truh 8/11, hŏng lu hdră bruă dhar kreh, kdŏ mmuñ jăk siam ti ƀuôn hgŭm Pleiku, să Biển Hồ leh anăn dŭm alŭ wăl mkăn mơ̆ng čar Gia Lai.

Mđing truh kơ hdră bruă dhar kreh jăk siam anei, Knơ̆ng bruă sang čư̆ êa să Čư̆ A Thai, čar Gia Lai mkŏ mjing nanao 3 mlam rang mdah tông čing, čuh pui leh anăn mnơ̆ng ƀơ̆ng huă ti dŭm alŭ Plei Pông, Plei Hek, Glung Mơlan leh anăn Plei Ơi. Ti wăl tač sang roong alŭ Plei Pông, ti djiêu pui ƀơ̆ng, lu mnuih ƀuôn sang leh anăn phung thâo mbruă mdah leh dŭm klei tông čing, kdŏ čhuang bi mni kơ klei bi mguôp, klei khăp mă bruă knuă, khăp kơ ƀuôn sang lăn čar. Amai Đinh Đjơn ti alŭ Plei Pông, să Čư̆ A Thai bi êdah:

"Amâo djŏ knŏng hjăn pô ôh ƀiădah jih jang mnuih ƀuôn sang hlăm ƀuôn mơak snăk, kyua dưi bi tuôm, bi mjĕ mjuk, hưn mdah klei jăk siam dhar kreh čing čhar mnuih Bahnar pô".

Hrăm mbĭt hŏng grăp ênai čing, klei kdŏ čhuang êdu êun, mnuih ƀuôn sang leh anăn phung tuê hiu čhưn ênguê lŏ dưi ƀơ̆ng kpiê čeh leh anăn dŭm mta mnơ̆ng ƀơ̆ng knhuah gru mơ̆ng mnuih Bahnar msĕ si: hla mtei, čĭm ăm, êsei braih lŏ. Đinh Byo - Khua mduôn ƀuôn Plei Pông ƀuh hơ̆k mơak kyua phung mda asei dôk lŏ čuê knhuah gru dhar kreh djuê ana pô.

“Kâo ară anei khua thŭn leh ƀiădah ăt nao hgŭm tông čing hŏng phung hlăm êpul tông čing mơ̆ng ƀuôn. Hlăm wưng kơ anăp, kâo srăng lŏ dơ̆ng mtô bi hriăm, ktrâo lač kơ anak čô hriăm tông čing čiăng kriê pioh knhuah dhar kreh djuê ana Bahnar ti alŭ wăl să Čư̆ A Thai”.

Ti ƀuôn Ia Gri, ƀuôn hgŭm Biển Hồ, ai êwa knăm mơak ƀrư̆ mtluk mtlak hĭn êjai êpul êya mnuih Jarai mkŏ mjing knăm mak sang roong mrâo. Hlăm wăl anôk hing ang, gơ̆ng ngă yang dưi mdơ̆ng, mnơ̆ng ngă yang dưi mprăp, ênai čing kwang msĕ si asăp kkuh drông, asăp akâo klei êđăp ênang, yan ngă bruă jăk siam leh anăn klei hdĭp trei mđao. Pyui - Khua bruă Đảng ƀuôn Ia Gri mñă klă, sang roong mrâo amâo djŏ knŏng jing hdră rŭ mdơ̆ng djuê ana ƀiădah lŏ jing klei bi êdah kơ klei bi mguôp, hrăm mbĭt mkŏ mkra ƀuôn sang.

"Klei yuôm bhăn mơ̆ng klei ngă yang sang roong anei jing čiăng kơ mnuih ƀuôn sang dưi djă pioh mnơ̆ng kriê pioh mơ̆ng djuê ana pô, tal dua jing hưn mdah bruă hiu čhưn ênguê êpul êya truh hŏng phung tuê hlăm lehanăn êngao ala čar. Dŭm mlan hruê mnuih ƀuôn sang suăi êmăn, hrăm mbĭt sa ai tiê dưi ngă sang roong anei. Mnuih ƀuôn sang hơ̆k mơak kyua mâo Đảng lehanăn knŭk kna đru kơ ƀuôn, čang hmăng srăng đĭ kyar hĭn".

Festival čing čhar - Hruê kăm mnga Tăng phĭ - Čư̆ pui Čư̆ Đang Ya thŭn 2026 ti Gia Lai mâo klei nao hgŭm mơ̆ng giăm 1.500 čô mbruă, ba wĭt wăl anôk bi mguôp dhar kreh lu jơr. Ênai čing, ênai čhar, ênai hgơr, ênhiang kdŏ čhuang mbĭt hŏng ênai mơ̆ng dŭm mta kdrăp tông ayŭ djuê ana, mjing leh ênai kwang mdê hjăn mơ̆ng čư̆ dliê. Mbĭt hŏng anăn jing klei bi kƀĭn mơ̆ng êa mil mơ̆ng mnơ̆ng pơ̆k mñam djuê ana, klei krah mkra rup djuê ana leh anăn bruă hrĭ mñam mâo leh mơ̆ng đưm. Mđing truh kơ knăm anei, Ngô Đức Mạo - Khua Anôk bruă dhar kreh - hâo hưn leh anăn mjuăt ktang asei mlei să Phú Túc, čar Gia Lai brei thâo:

“Hmei ruah phung thâo mbruă mâo klei thâo hriăm mjuăt jăk ti dŭm mta bruă leh anăn mbha ti grăp să mâo klei mdê mdê. Msĕ si pơ̆k mñam leh anăn kdrăp tông ayŭ djuê ana snăn ti să Ia Dreh, klei krah mkra rup leh anăn hrĭ mñam leh anăn mkra čing čhar snăn ti dŭm să Ia Rsai, Phú Túc leh anăn Uar. Hmei ba truh kơ hruê knăm sa hdră kluôm, kñăm hưn mdah rup leh anăn knhuah dhar kreh mơ̆ng mnuih Jarai”.

Mơ̆ng ênai čing kwang, dŭm mta mnơ̆ng pơ̆k mñam, dŭm pŏk rup hŏng kyâo mâo lu klei bi êdah,… grăp pŏk rup đru yăl dliê kơ ai hdĭp dhar kreh mơ̆ng dŭm djuê ana Gia Lai. Dŭm boh tŭ yuôm dhar kreh mơ̆ng dŭm djuê ana lŏ dơ̆ng kriê pioh, đru mkŏ mjing klei jăk siam mơ̆ng klei hdĭp lăn dap kngư hruê anei.