Ti krah wăl anôk hdĭp mda êpul êya, ti anăp tač sang roong ƀuôn Ia Mrơn, să Ia Pa, čar Gia Lai, gơ̆ng ngă yang dlông dlĭn dưi bi msiam jăk siam, bŏ hŏng êa mil. Djiêu gơ̆ng ngă yang jing dŭm mta mnơ̆ng myơr mâo leh mnuih ƀuôn sang mprăp djăp ênŭm; mâo pă boh gŏ kpiê, sa drei ŭn jŭ lehanăn dua bai mdiê mrâo. Pô riu yang Rô Bhak, hŏng kdrăp čŭt hơô djuê ana, bi ala kơ mnuih ƀuôn sang hluê ngă klei bhiăn ngă yang mơak mdiê mrâo.

“Ơ phung yang hlăm adiê, hlăm lăn, yang čư̆, yang êa, yang mdiê mơ̆ng mnuih Jarai! Hruê anei, ƀuôn sang hmei dưi hrui wĭt leh dŭm asăr mdiê akŏ yan. Kyua mâo hjan jăk, angĭn êđăp, kyua phung yang đru, ana mdiê đĭ jing, mboh, bi asăr, ba wĭt asăr braih rông ba ƀuôn sang. Ară anei ƀuôn sang mprăp leh êsei mrâo, kpiê čeh leh anăn mnơ̆ng ngă yang, mpŭ myơr kơ phung yang, akâo dưi lač jăk kyua kriê mgang leh kơ pưk hma"

Leh sa yan mă bruă suăi êmăn, klei ngă yang "Mơak mdiê mrâo" jing wưng čiăng kơ mnuih Jarai bi êdah klei lač jăk kơ lăn adiê, yang leh anăn aê aduôn atâo atiêt đru leh kơ yan ngă bruă jăk êa hlĭm hjan. Aduôn Nay H'Luir ti ƀuôn Chơma, să Ia Pa nao hgŭm hlăm hruê knăm brei thâo, anei jing wưng mnuih ƀuôn sang lŏ dlăng wĭt boh tŭ dưn bruă knuă, mơĭt klei hmăng hmưi kơ dŭm yan ngă bruă ti anăp.

“Să Ia Pa mkŏ mjing hruê knăm djuê ana leh anăn lŏ mkŏ mjing Knăm mơak mdiê mrâo mơ̆ng mnuih Jarai pô ƀuh jing jăk êdi. Tŏk čing, kdŏ čhuang amâo mâo dưi kƀah ôh hlăm klei jăk siam dhar kreh djuê ana mơ̆ng đưm mnuih Jarai. Boh nik phung amai adei čŭt hô kdrăp djuê ana, ao pơ̆k mñam hŏng kngan pô Jarai mñam jing ktưn hưn êdi. Knăm mơak mdiê mrâo, huă êsei mrâo hlăk lŏ wĭt luč leh, ƀiădah mâo knŭk kna mđing uêñ lŏ mkŏ mjing msĕ snăn jing mơak êdi. Anei jing klei bhiăn jăk siam mơ̆ng đưm; leh hrui êmiêt boh mnga, huă êsei mrâo brei ngă yang kơ yang adiê, lač jăk kơ yang đru leh, akâo kơ djăp mta klei jăk siam hĭn”.

Bruă lŏ mkŏ wĭt "Klei ngă yang huă êsei mrâo" ti să Ia Pa, čar Gia Lai jak iêu klei nao hgŭm mơ̆ng êpul êya, boh nik jing phung khua mduôn, phung thâo mbruă leh anăn mnuih thâo săng kơ klei bhiăn. Ksor Ther, Khua adŭ bruă mtô bi hriăm Ia Pa, čar Gia Lai hđăp brei thâo, êlâo kơ lŏ mkŏ wĭt "Klei ngă yang huă êsei mrâo" mơ̆ng mnuih Jarai, dhar bruă djŏ tuôm ksiêm dlăng leh klei blŭ phung khua mduôn leh anăn phung thâo lu ti alŭ wăl.

Anei jing thŭn tal êlâo să mkŏ mjing ƀuh jing mơak êdi. Êlâo kơ mkŏ mjing, phung khua kiă kriê alŭ wăl mâo klei bi trông hŏng mnuih ƀuôn sang, să mâo blei čing brei kơ dŭm boh ƀuôn, mprăp kdrăp čŭt hơô kơ phung hđeh čŭt hơô leh anăn hriăm tông čing, kdŏ čhuang. Knŭk kna mâo klei đru leh anăn mprăp jăk êdi. Knăm ngă yang mdiê mrâo, klei bhiăn bi dôk ung mô̆ mơ̆ng đưm leh anăn ngă yang akŏ pin êa dưi lŏ mkŏ mjing hlăm gưl anei, hmei ƀuh mơak êdi čiăng kơ jih jang mnuih thâo kơ dhar kreh djuê ana jăk siam.”

Bruă mkŏ wĭt "Knăm mơak mdiê mrâo" ti Ia Pa, čar Gia Lai mguôp hŏng mta kñăm kriê pioh, mđĭ lar boh tŭ yuôm knhuah dhar kreh hlăm Hdră kñăm ala čar kơ mđĭ kyar dhar kreh thŭn 2026. Nguyễn Thái Sơn - Khua Anôk bruă dhar kreh, hâo hưn leh anăn mjuăt ktang asei mlei să Ia Pa, brei thâo, wưng kơ anăp, alŭ wăl lŏ mkŏ wĭt dŭm knăm mơak djuê ana kñăm kriê pioh leh anăn mđĭ lar knhuah dhar kreh dŭm djuê ana.

          Anei jing knăm mơak mdiê mrâo dưi mkŏ mjing ti ƀuôn Ia Mrơn, jing knhuah dhar kreh jăk siam, mdê hjăn mơ̆ng mnuih Jarai. Bruă ngă brei dưi krơ̆ng nanao čiăng kriê pioh lehanăn mđĭ lar dŭm boh tŭ yuôm dhar kreh.Hdră êdei anei jing klei tông čing, dŭm knăm mơak huĭ srăng luč ram, snăn Anôk bruă dhar kreh srăng lŏ mkŏ mjing čiăng kơ phung mda asei lŏ čuê, tui ksiêm, lông ngă".

Leh knăm ngă yang, ai êwa hruê kƀĭn čhưn ti ƀuôn Ia Mrơn, să Ia Pa lŏ mčhĭt muăt hlăm ênai čing čhar leh anăn dŭm klei kdŏ čhuang. Dŭm êpul tông čing mơ̆ng dŭm ƀuôn hlăm să bi tuôm, bi mjĕ mjuk; mnuih ƀuôn sang leh anăn phung tuê hiu čhưn ênguê nao hgŭm hlăm klei bi lông ktŭng klei, kdŏ čhuang, pĭt ală mă bip. Dŭm anôk rang mdah mnơ̆ng dhơ̆ng lŏ hma, mnơ̆ng mơ̆ng dliê kmrơ̆ng leh anăn mnơ̆ng ƀơ̆ng huă alŭ wăl đru thiăm êa mil kơ hruê kƀĭn čhưn.