Mlam knhal jih hruê kăm, sang êpul êya ƀuôn Dak Ndrung, să Đức An, čar Lâm Đồng mčhĭt muăt ênai čing čhar. 25 čô hriăm mâo phung thâo mbruă mtô bi hriăm grăp ênhiang čing, mơ̆ng klei djă čing truh kơ klei tông čiăng kơ djŏ ênhiang. Mơ̆ng grăp mmông hriăm, ênai čing ƀrư̆ ƀrư̆ jăk, jĕ giăm. Amai Thị Hợi, hơ̆k mơak brei thâo:

 "Êlâo kơ hriăm, kâo mĭn tông čing dleh êdi. Ƀiădah nao hgŭm hlăm adŭ hriăm anei, kâo ƀuh amâo dleh msĕ si pô mĭn. Truh ară anei, kâo dưi tông leh tlâo klei tông čing phŭn. Mơak êdi kyua pô thâo tông leh čing. Kâo srăng gĭr hriăm thiăm čiăng đru mguôp kriê pioh dhar kreh pô.

Adŭ mtô bi hriăm čing čhar tal êlâo mâo klei đru mơ̆ng bruă sang čư̆ êa să Đức An leh anăn knơ̆ng bruă dhar kreh čar Lâm Đồng. Leh adŭ hriăm bi leh, phung amai adei ăt čŏng pô krơ̆ng kjăp hdră hriăm ti sang dhar kreh ƀuôn Dak Ndrung. Nanao hlăm dŭm mmông tlam knhal jih hruê kăm, phung amai adei lŏ dăp bruă pưk hma, bruă sang čiăng hrăm mbĭt lŏ bi hriăm grăp ênhiang čing, mñă kơ hdơ̆ng pô grăp ênhiang tông. Dŭm mmông hriăm anăn đru leh ênai čing ƀrư̆ ƀrư̆ jing jĕ giăm, ñŭ kma hlăm klei hdĭp ƀuôn sang.  Điểu Thị Huế - K’iăng khua bruă Đảng, Khua anôk bruă mặt trận ƀuôn Dak Ndrung lač:

"Yang hruê, amai adei nao pưk hma, duh kơ gŏ sang. Truh mmăt lŏ dơ̆ng mkŏ mjing bi kƀĭn ti sang dhar kreh čiăng hriăm tông čing. Grăp čô hơ̆k mơak, hur har. Kyua klei uêñ mĭn, đru leh anăn mjing klei găl mơ̆ng Knơ̆ng bruă, Adŭ bruă Dhar kreh, mnuih ƀuôn sang hmei mâo thiăm klei găl kriê pioh, răng mgang leh anăn mđĭ lar dŭm boh tŭ yuôm knhuah dhar kreh djuê ana pô".

Hŏng phung thâo mbruă, bruă mtô bi hriăm čing amâo djŏ knŏng jing mtô kơ hdră ba yua sa mta kdrăp pĕ tông, ƀiădah lŏ jing lŏ čuê wăt klei hdĭp, đru kơ phung mda asei thâo kơ grăp ênhiang čing kwang hlăm ya wưng, ya klei yuôm bhăn, čiăng mơ̆ng anăn pô thâo bi mni hlăm klei hdĭp mơ̆ng ƀuôn sang. Mơ̆ng grăp mmông hriăm mjuăt, Pô thâo mbruă Thị Dryan hmăng hmưi mâo thiăm lu phung mda asei nao truh hŏng čing čhar:

"Să Đức An mjing leh klei găl kơ ƀon pŏk adŭ mtô tông čing čiăng kơ phung hđeh mâo klei khăp čiăng dưi hriăm. Mơ̆ng adŭ hriăm, hmei čang hmăng mtô kơ dŭm ênhiang čing đưm kơ phung hđeh, čiăng kơ anak čô amâo wơr ôh mnơ̆ng kriê pioh mơ̆ng aê aduôn pô djă pioh mơ̆ng đưm."

Čiăng mđĭ ai phung thâo mbruă lŏ čuê dŭm boh tŭ yuôm dhar kreh jăk siam kơ ênuk gưl êdei, leh bi mŭt mbĭt să, Knơ̆ng bruă sang čư̆ êa să Đức An ba mdah leh Hdră mtrŭn đru kơ klei hdĭp grăp mlan kơ dua Pô thâo mbruă êdah kdlưn mơ̆ng ƀuôn Dak Ndrung. Hlăm anăn, Pô mbruă êdah kdlưn Thị Phyơn, Khua êpul kdŏ mmuñ ƀuôn Dak Ndrung, dưi đru êbeh 3 êklăk prăk hlăm grăp mlan. Hŏng ñu, anei jing klei mđing dlăng bŏ klei yuôm bhăn hlăm hdră kriê pioh dhar kreh Mnông.

"Kâo mơak snăk leh anăn lač jăk kơ Đảng, Knŭk kna mâo leh hdră đru kơ kâo êbeh 3 êklăk prăk 1 mlan. Anei jing klei mđĭ ai prŏng čiăng kâo lŏ dơ̆ng kriê pioh dhar kreh djuê ana. Kâo srăng lŏ dơ̆ng ktrâo lač, mtô bi hriăm klei tông čing kơ phung mda asei, ba êpul tông čing mniê đĭ kyar hĭn, čiăng kơ anak čô lŏ čuê knhuah gru mơ̆ng aduôn aê."

Mơ̆ng dŭm boh tŭ yuôm dhar kreh dưi kriê pioh, să Đức An dôk tă hdră êlan mkŏ mjing anôk hiu čhưn ênguê êpul êya ti ƀon Dak N’Drung. Phung tuê hiu čhưn ênguê srăng mâo wưng lông dlăng čing čhar, dŭm knăm mơak, bruă pơ̆k mñam leh anăn mnơ̆ng ƀơ̆ng M’nông. Hlăm anăn, sang dhar kreh êpul êya jing anôk phŭn, rang mdah dŭm mnơ̆ng dhơ̆ng djuê ana, hưn mthâo knhuah dhar kreh alŭ wăl leh anăn dŭm bruă dhar kreh hiu čhưn ênguê. Thị Rơi, Khua bruă Đảng ƀon Dak N’Drung, lač:

"Bruă mtrŭt mjhar amai adei, phung êdam êra nao hgŭm hriăm tông čing amâo djŏ knŏng kriê pioh knhuah gru ƀiădah lŏ mđĭ klei bi hgŭm êpul êya. Ƀuôn hgŭm duh bi liê rŭ mdơ̆ng leh sang dhar kreh mrâo kơ ƀuôn, mjing klei găl kơ mnuih ƀuôn sang bi kƀĭn, hriăm mjuăt. Hmei čang hmăng ba dŭm kdrăp, mnơ̆ng yua hlăm klei hdĭp djuê ana hlăm anôk rang mdah tinei, čiăng kơ phung mda asei thâo săng hĭn kơ dhar kreh djuê ana.

Mơ̆ng kngan khăng kyua ngă bruă pưk hma, phung mniê M'nông ti ƀon Dak N'Drung dôk mjum ênai čing, krơ̆ng kjăp mngăt êwa kơ ênai čing ƀuôn sang. Pui ti sang dhar kreh êpul êya ăt mngač grăp mlam knhal jih hruê kăm, ênai čing kwang nanao ba knhuah dhar kreh ƀuôn sang kpưn đĭ mbĭt hŏng klei đĭ kyar mơ̆ng ƀuôn sang Đức An, Lâm Đồng.