Čar Lâm Đồng dôk mjêč mprăp, pŏk mlar wăl anôk mnga leh anăn mkŏ mjing dŭm hdră bruă dhar kreh, kdŏ mmuñ. Mđing truh kơ Festival, truh ară anei, êbeh 70 să, ƀuôn hgŭm mơ̆ng čar Lâm Đồng pŏk ngă leh hdră bruă "Grăp čô mnuih pla mnga, grăp sang pla mnga, ana kyâo mtah kkuh drông Festival mnga Đà Lạt tal XI - thŭn 2026". Hjăn dŭm ƀuôn hgŭm krĭng wăl krah Đà Lạt dôk pŏk ngă lu ktuê êlan mnga, hdră rang mdah, đru mjing wăl anôk mtah, doh, siam kơ ƀuôn prŏng hiu čhưn ênguê Đà Lạt.

Festival Mnga Đà Lạt thŭn 2026 ăt pŏk ngă hluê ngă lu klei mĭn mrâo, msĕ si bi mguôp mnga hŏng ênhiang mmuñ hluê hŏng dŭm hdră bruă, knăm mơak: "Knhuah mnga"; "Klei mmuñ ênhiang mnga Đà Lạt"; "Ênhiang mmuñ leh anăn Mnga". Đinh Văn Tuấn, Kiăng Khua Knơ̆ng bruă sang čư̆ êa čar Lâm Đồng, brei thâo, bruă pŏk mlar wăl anôk mkŏ mjing, mđĭ klei nao hgŭm mơ̆ng êpul êya dưi čang hmăng srăng mjing thiăm ai lar bra kơ Festival thŭn anei.