Pô mbruă êdah êdi A Bang (mnuih Sêdang) ti alŭ Đăk Tô 3, să Đăk Tô, čar Quảng Ngãi. Hlăk điêt, ñu kreh tui hluê ama, ayŏng leh anăn mnuih prŏng hlăm ƀuôn nao hlăm dliê duah đĭng đrao mkra brô̆. Ăt mơ̆ng dŭm gưl nao anăn, ñu thâo ruah mnơ̆ng pioh mkra kdrăp tông ayŭ leh anăn hdră mkra leh anăn klei thâo mĭn, mgei ai tiê leh anăn thâo kral klei jăk, klei jăk siam mơ̆ng ênai.

Kâo amâo mâo hriăm ôh klei kưt muiñ hlăm sang hră. Mơ̆ng điêt kâo khăp êdi kơ ênai brô̆, ênai čing kyua anăn tui hluê ama, tui hluê ayŏng hriăm. Ama leh anăn ayŏng mtô kơ kâo ăt mdê mơh, khăng djă đĭng đrao guôm ti knga leh anăn tông êdu êun, lač kơ kâo hmư̆ bi nik, hdơr kơ ênai anăn. Leh anăn, dŭm ênai adôk hdơr hlăm kŏ dlô, kâo tui hluê anăn čŏng pô mkra brô̆, čŏng pô hriăm tông dŭm kdrăp tông ayŭ djuê ana pô”.

Msĕ snăn yơh, A Bang ƀrư̆ ƀrư̆ thâo mkra klông put, t’rưng, lehanăn wăt čing boh tâo. Amâo djŏ knŏng mkra mjing leh anăn mdah dŭm mta kdrăp pĕ tông mơ̆ng đưm, Pô thâo mbruă A Bang lŏ jih ai tiê mtô bi hriăm kơ găp djuê hlăm gŏ sang leh anăn mnuih ƀuôn sang hlăm ƀuôn. Anak mniê ñu jing amai Y Biêng mâo ñu mtô bi hriăm klei pĕ klông put, t’rưng lehanăn nao hgŭm hlăm êpul mdah klei pĕ tông kdrăp djuê ana mơ̆ng să Dak Tô.

“Kyua kmha mtô bi hriăm snăn kâo thâo tông klông pút, tơrưng msĕ si ară anei. Kâo khăp êdi kơ ênai mơ̆ng dŭm kdrăp anei, hmư̆ jăk êdi, jĕ giăm. Ƀrư̆ hriăm, ƀrư̆ tông snăn kâo ƀuh klei mmuñ ênhiang djuê ana pô yuôm bhăn snăk."

Ti alŭ Đăk Tô 3, să Đăk Tô, A Bang mbĭt hŏng êpul phung thâo mbruă hriăm mjuăt, mkŏ mjing dŭm klei kdŏ mmuñ jăk siam čiăng nao hgŭm hlăm dŭm klei bi lông, bi kƀĭn ti alŭ wăl. Mâo dŭm klei ñu leh anăn ayŏng adei čŏng pô čih mkra, pô kdŏ mmuñ, msĕ si tông klông pŭt “Knăm mơak sang mrâo", tông t'rưng leh anăn hgơr "Knăm mŭt yan mrâo", "Knăm mơak mdiê mrâo". Amai Y Yun ti alŭ 3 khăp kơ ênai brô̆ klông pŭt, mâo pô thâo mbruă A Bang mtô bi hriăm klă klơ̆ng, leh anăn nao hgŭm hlăm êpul mdah klei tông čing čhar mơ̆ng ti să. Amâo djŏ knŏng snăn ôh, ñu hmăng hmưi dưi lŏ mtô kơ anak čô pô.

“Kyua mâo pô thâo mbruă A Bang mtô bi hriăm snăn kâo thâo leh hdră tông klông pút. Kâo mĭn brei drei lŏ dơ̆ng tui hriăm, mbĭt anăn lŏ mtô bi hriăm kơ phung anak čô dŭm klei drei thâo čiăng đăm luč ram ôh. Čang hmăng kơ phung hđeh, phung mda asei amâo djŏ knŏng thâo săng ƀiădah brei khăp, mpŭ kơ dhar kreh djuê ana pô".

Lu thŭn êgao, pô thâo mbruă A Bang amâo djŏ knŏng ngă bruă ti alŭ wăl, ñu lŏ nao ti dŭm să Văn Lem, Đăk Trăm leh anăn krĭng Tu Mơ Rông čiăng mtô mkra leh anăn mdah dŭm mta kdrăp tông ayŭ msĕ si klông put, t'rưng, đru kriê pioh leh anăn mđĭ lar knhuah dhar kreh. Thŭn 2022, pô thâo mbruă A Bang mâo Knơ̆ng bruă sang čư̆ êa čar Kon Tum mkăp hră tŭ yap klei tŭ đru kơ êpul hgŭm nao hlăm Klei bi lông Čing čhar - kdŏ čhuang dŭm djuê ana mnuih djuê ƀiă čar tal sa. Thŭn 2023, ñu nao hgŭm mbĭt hŏng Êpul hgŭm phung khua thŭn čar Kon Tum mdah kdrăp tông ayŭ djuê ana hŏng klei kdŏ mmuñ "Mơak mdiê mrâo" mâo mă klei pah mni B. A Ken, knuă druh dhar kreh să Đăk Tô, čar Quảng Ngãi brei thâo:

“Pô thâo mbruă A Bang mâo Knŭk kna mđup brei anăn knăl Pô thâo mbruă êdah kdlưn. Awa ngă leh lu mta kdrăp tông ayŭ djuê ana, boh nik klông put, tơrưng… Grăp blư̆ hlăm să mâo knăm mơak amâodah bruă dhar kreh, grăp čô kreh iêu awa nao hgŭm. Awa ăt hur har, mâo bruă jhŏng đru mguôp ai tiê pô.”

Nao mdah leh lu anôk, mâo čih yap lu klei tŭ dưn hŏng dŭm klei bi lông, klei kdŏ mmuñ, lehanăn mâo knŭk kna mđup brei anăn knăl pô mbruă êdah kdlưn. Anăn jing klei myun, ƀiădah hŏng A Bang, kdrăp pĕ tông djuê ana, ênai brô̆, klei mmuñ, klei kdŏ jing êrah asei, jing knhuah gru dhar kreh djuê ana pô čiăng dưi djă pioh kơ ênuk êdei:

Bruă ngă leh anăn pĕ tông kdrăp tông ayŭ djuê ana anei siă suôr leh hŏng klei hdĭp kâo. Kâo ngă kyua pô khăp kơ ƀuôn sang, khăp kơ ênai brô̆ aduôn aê lui leh. Amâo djŏ knŏng hlăk nao mdah, ƀiădah wăt ti sang pô, amâodah hlăk mnuih ƀuôn sang bi kƀĭn, hmei ăt ba kdrăp tông ayŭ nao pĕ tông".

Mơ̆ng dŭm đĭng đrao, đĭng mơô mĭndah msĕ si aguah tlam, ƀiădah hŏng kiê kngan pô thâo mbruă A Bang jing leh ênai klông pút, ênai t'rưng kwang hlăm ƀuôn sang. Hŏng klei khăp čiăng leh anăn ai tiê kriê pioh knhuah dhar kreh djuê ana, pô thâo mbruă A Bang lŏ dơ̆ng mtô kơ phung mda asei dŭm ênai kwang dhar kreh Xơ Đăng, čiăng kơ klei jăk siam anei ăt dôk hdĭp nanao hŏng ƀuôn sang./.