Hŏng 18 anôk bruă nao hgŭm rang mdah, Mlam mdah Ao dai leh anăn Kdrăp čŭt hơô djuê ana hưn mthâo lu klei jăk siam dhar kreh mơ̆ng dŭm djuê ana, krĭng kwar hrăm mbĭt bi kƀĭn ti Dak Lak. Mơ̆ng ao dai truh kơ kdrăp čŭt hơô Êđê, Jarai, Mnông, Thái, Tày, Mường… grăp kdrêč rang mdah bi êdah sa knhuah mdê hlăm klei lu jơr dhar kreh mơ̆ng Dak Lak leh bi mŭt mbĭt.

Nao hgŭm hlăm klei rang mdah jing phung knuă druh, phung mniê hlăm êpul hgŭm, phung ngă lŏ hma, phung mniê thâo lu, phung mniê duh mkra mnia mblei leh anăn phung mniê hlăm êpul lĭng kahan. Dŭm anôk bruă ba ti anôk rang mdah dŭm kdrăp čŭt hô djuê ana mơ̆ng đưm mbĭt hŏng dŭm hdră mkra mrâo, bi mguôp gru grua pơ̆k mñam hŏng ao dai.

Hlăm kdrăp čŭt hô djuê ana Thái, amai Hoàng Thị Dương, hriê mơ̆ng să Ƀuôn Đon yăl dliê, anei jing wưng čiăng kơ phung hgŭm mniê ti dŭm alŭ wăl bi tuôm, bi mjĕ mjuk leh anăn lŏ tui ksiêm kơ dhar kreh mơ̆ng dŭm djuê ana.

“Anei jing sa hruê mơak mơ̆ng phung mniê leh anăn ăt jing klei găl čiăng kơ phung mniê bi mguôp plah wah amai adei mơ̆ng dŭm êpul hgŭm phung mniê mơ̆ng dŭm să. Êjai aguah tlam drei jing ktrŏ snăk, amâo mâo mmông čiăng bi mjĕ mjuk mbĭt leh anăn anei jing sa klei găl čiăng kơ amai adei bi mjĕ mjuk, bi mguôp, bi hriăm mbĭt leh anăn lŏ thâo ƀuh lu knhuah gru mơ̆ng grăp krĭng kwar”.

Mbĭt hŏng bruă mpŭ mni kơ dhar kreh djuê ana, hdră lŏ ba mdah Êpul hgŭm KOLs KOCs Dak Lak, kñăm mkŏ mnuih ngă lŏ hma, êpul hgŭm bruă hŏng phung mkŏ mjing klei čih, hưn mthâo leh anăn čhĭ mnơ̆ng hlăm wăl anôk mrô. Aduôn H'Giang Niê, Khua Êpul hgŭm mnuih ngă lŏ hma čar Dak Lak lač, mâo thiăm lu mnuih ngă lŏ hma jing phung mâo klei hmăi hlăm hla pŏk yang ƀuôn leh anăn mđĭ boh tŭ bruă ngă mơ̆ng êpul hgŭm, ăt jing hdră đru mguôp kơ klei đĭ kyar bruă lŏ hma alŭ wăl.

“Hmei čang hmăng kơ êpul hgŭm KOLs, KOC mơ̆ng čar srăng bi mguôp thiăm lu anôk mnia mblei prŏng hlăm alŭ wăl kluôm ala lač kluôm leh anăn tăp năng jing kbiă ti êngao tar rŏng lăn, mkŏ mjing sa êpul čiăng kñăm hưn mdah dŭm mta mnơ̆ng dhơ̆ng mơ̆ng čar Dak Lak leh anăn dŭm čar mkăn hlăm kluôm ala. Hluê hŏng êpul hgŭm anei, hmei čiăng mjuăt bi hriăm jing sa êpul ƀĭng ngă lŏ hma hur har, mbruă leh anăn jhŏng nao hlăm anôk mnia mblei mrô”.

Ăt hlăm gưl anei, ti Ƀuôn Ama Thuôt, Dak Lak, mkŏ mjing klei rang mdah rup hŏng mnal êun Lăn Dap Kngư. Sang krum dlông, bruă mkra mnơ̆ng hŏng lăn čuh, pơ̆k mñam hŏng kngan mbĭt hŏng dŭm pŏk rup jĕ giăm hlăm klei hdĭp mơ̆ng mnuih ƀuôn sang Lăn Dap Kngư mâo phung čih kač rup hlăm mnal hŏng klei êdu êun, jăk siam.

Pô čih kač rup Trương Văn Linh, Khua adŭ bruă čih kač rup, Sang hră gưl krah dhar kreh kdŏ mmuñ Dak Lak ba kơ klei rang mdah 3 klei čih kač rup hluê knhuah êlam. Hlăm anăn, klei čih kač rup Mnơ̆ng Myơr mơ̆ng lăn hrah ñu mă klei mđĭ ai mơ̆ng lăn bazan leh anăn ana kphê, ƀiădah amâo mâo bi êdah hŏng dŭm mta rup jêñ jêñ. Pô čih kač rup Trương Văn Linh lač:

“Kphê mơ̆ng Dak lak mâo leh klei dưi truh hŏng tar rŏng lăn, snăn kâo mă klei yuôm bhăn jing “Mnơ̆ng mơ̆ng lăn hrah” hŏng hdră čih kač rup êlam. Tơdah arăng dôk dlăng ti anăp rup, hluê si klei hdơr mơ̆ng grăp čô snăn mâo klei thâo săng mdê mdê”.

Grăp pŏk rup ti anôk rang mdah bi êdah klei khăp mơ̆ng pô čih kač rup hŏng krĭng lăn leh anăn dhar kreh Lăn Dap Kngư. Klei rang mdah Mrai Dap Kngư mkŏ mjing ti Sang kriê pioh mnơ̆ng dhơ̆ng kphê tar rŏng lăn, Ƀuôn Ama Thuôt, Dak Lak, pŏk ƀăng kơ phung tuê truh jih hruê 30/10/2026.