Hruê knhal jih hruê kăm, gŏ sang Rcom H’Kliơng ti ƀuôn Rưng Ma Nin, să Ia Rbol, čar Gia Lai mâo wưng huă mnăm hŏng čeh kpiê, mơak mñai kyua ñu mrâo mâo Êpul hgŭm mtrŭt mđĭ ai klei hriăm hră mơar Việt Nam mđup brei hră pah mni. Bi ala gŏ sang nao hgŭm hlăm Klei bi kƀĭn bi mni kơ dŭm gru hmô hriăm hră kdlưn hĭn kluôm ala ti ƀuôn prŏng phŭn Hà Nội wĭt leh. Nay Nhơn - anak êkei tal êlâo mơ̆ng Rcom H’Kliơng, jing nai mtô leh wĭt mdei bruă, lač klei huă mnăm bi êdah klei hdơr knga kơ amĭ ama mđing uêñ kơ klei hriăm hră mơ̆ng anak čô:

“Gŏ sang hmei, wăt tơdah êlâo dih dleh dlan êdi, gưl aduôn aê, amĭ ama suăi êmăn, ngă pưk hma ƀiădah ăt rông ba anak čô hriăm hră mơar djăp ênŭm. Truh kơ ară anei, klei hdĭp gŏ sang hmei hơĭt leh anăn anak čô lŏ dơ̆ng hriăm hră mơar truh hnơ̆ng. Amĭ ama gĭr leh čiăng kơ anak čô hriăm hră mơar, si klei dleh dlan ăt găn jih, čang hmăng kơ anak čô hriăm hră mơar tŭ jing, đru kơ ƀuôn sang leh anăn bruă yang ƀuôn. Anăn jing klei mtă mtăn, klei mđĭ ai mơ̆ng amĭ ama kơ anak čô. Mơ̆ng anăn anak čô gưt asăp amĭ ama, hluê ngă djŏ hdră êlan, hdră bhiăn leh anăn klei bhiăn ala čar".

 H'Kliơng brei thâo, phung anak ñu mphŭn đĭ hriê kơ prŏng leh hruê lăn čar mâo klei êngiê. Klei hdĭp ti krĭng čư̆ čhiăng Ia Rbol, čar Gia Lai hlăk anăn dleh dlan êdi. Mâo mmông gŏ sang knŏng mâo ktơr đeh, hbei ƀlang, tăp năng mâo mmông ư̆ ăn tian êpa. Hlăm boh klei anăn, ung mô̆ ñu ăt gĭr kriê dlăng kơ phung anak nao sang hră mơar, mkiêt mkriêm grăp klŏ hbei ƀlang, boh ktơr; tăp năng pioh mnơ̆ng ƀơ̆ng pô čiăng kơ anak mâo ai nao sang hră mơar. Ñu ktưn hưn kyua jih jang 9 čô anak (5 čô mniê, 4 čô êkei) hriăm hră mơar tŭ jing; Mnuih tui tiŏ bruă mdrao mgŭn, mnuih ngă bruă mtô bi hriăm, mnuih mă bruă hlăm lĭng kahan amâo dah anôk bruă knŭk kna mơ̆ng gưl să truh kơ gưl čar.

“Êlâo adih, wăt tơdah klei hdĭp dleh dlan, suăi êmăn ƀiădah brei rơ̆ng kơ anak čô hriăm hră mơar. Mâo mmông êsei amâo djăp huă, amâo mâo ao hơô, kâo ăt gĭr brei diñu hriăm hră mơar. Kyua kâo mĭn, phung anak mâo klei jăk jĭn jing mâo hriăm hră, êdei anei mâo klei thâo čiăng nao mă bruă, čŏng rông ba pô. Kâo êbeh leh 78 thŭn leh, čang hmăng kơ mnuih ƀuôn sang hlăm ƀuôn gĭr kơ anak čô hriăm hră mơar. Mâo hriăm kơh dưi mâo klei jăk jĭn, đru kơ yang ƀuôn, kơ ƀuôn sang”.

Nay Mun - Khua Êpul hgŭm mtrŭt mđĭ klei hriăm hră mơar să Ia Rbol, čar Gia Lai ktưn hưn să Ia Rbol jing krĭng lăn bŏ hŏng knhuah gru khăp kơ klei hriăm hră mơar. Msĕ si gŏ sang Ksor Chuel ti ƀuôn Rưng Ma Nhiu dưi mâo klei pah mni jing "gŏ sang phung hriăm gưl prŏng". Gŏ sang amai Rcom H'Kliơng ti ƀuôn Rưng Ma Nin mrâo mâo Êpul hgŭm mtrŭt mđĭ klei hriăm hră mơar Việt Nam mđup brei hră pah mni kyua mâo boh tŭ êdah kdlưn hlăm hdră hriăm hră mơar jih klei hdĭp. Hluê anăn đru mguôp mđĭ lar hdră bruă khăp kơ klei hriăm hră mơar ti alŭ wăl.

“Rcom H’Kliơng mâo jih jang 9 čô anak hriăm hră mơar tŭ jing. Ară anei phung anak hriăm leh prŏng leh anăn mŭt mă bruă hlăm dŭm anôk bruă knŭk kna. Čang hmăng mnuih ƀuôn sang pô tui hriăm hdră ngă anei mơ̆ng gŏ sang. Mbĭt anăn, iêo mthưr mnuih ƀuôn sang mkăn jĕ giăm kbưi, hâo hưn čiăng kơ dŭm gŏ sang ăt gĭr mă bruă leh anăn rông anak nao sang hră mơar bi jăk, êdei anei mŭt hlăm anôk bruă knŭk kna mă bruă kơ mnuih ƀuôn sang, kơ ƀuôn sang pô”.

Gŏ sang Rcom H'Kliơng mkŏ mjing klei huă mnăm kyua mâo Êpul hgŭm mtrŭt mđĭ klei hriăm hră mơar Việt Nam mđup brei hră pah mni jing gưl čiăng bi êdah klei hdơr knga prŏng prĭn kơ klei săn asei mơ̆ng amĭ ama kriê dlăng leh klei hriăm hră mơar kơ anak čô. Anăn jing klei thâo khăp kơ klei hriăm hră mơar dưi lŏ čuê hlăm dŭm ênuk gưl, leh anăn đru bi lar dŭm boh tŭ dưn jăk siam hlăm êpul êya.