Ti ping čư̆ nah Yŭ Dhŭng mơ̆ng čư̆ A Man (hlăm să Tuy An Đông, čar Dak Lak) mâo sa wăl msat đưm hŏng hlăm brô 200 boh msat, dưi mbha hlăm ênhă hlăm brô 1.5 héc-ta. Mơ̆ng wăl msat đưm anei dưi dlăng truh kơ kluôm krĭng mnuih ƀuôn sang dôk lu lehanăn krĭng dap mnai jăk siam djiêu gah jơ̆ng čư̆ A Man. Pô ksiêm hriăm kơ hƀuê ênuk dhar kreh Nguyễn Danh Hạnh brei thâo:

"Êjai ksiêm dlăng lăn ala krĭng anei, hmei ƀuh anei jing čư̆ nah Yŭ mơ̆ng čư̆ A Man, dlăng ti gŭ jing krĭng dap mnai jăk siam leh anăn ti anăp mâo sa hnoh êa. Anôk anei mơ̆ng dlông dlĭn dlăng jăk siam êdi. Hluê si klei mĭn mơ̆ng đưm, anôk anei mâo lăn ala jăk siam, snăn arăng ruah ngă anôk dơr msat."

Wăl msat đưm ti čŏng čư̆ A Man mâo 4 mta phŭn, jing msat rup aseh, msat rup mnga krih, msat rup krua leh anăn msat rup sang. Dŭm boh msat ăt dôk djă pioh klei siam, boh mnga ƀiădah lu jing jhat rai leh hluê thŭn mlan. Sa hră mơar mơ̆ng pô ksiêm duah mnuih Prăng jing Anbert Laborde mâo mơ̆ng akŏ ênuk tal XX lač, dŭm boh msat kiê kngan leh anăn dŭm boh msat rup mnga krih mâo klei hmăi mơ̆ng klei đăo Yơng. Hlăm anăn, msat rup mnga krih jing klei bi êdah mơ̆ng sang yơng. Msat rup kiê kngan mâo klei yuôm bhăn jing aseh ba mngăt mnuih djiê wĭt kơ krĭng "Yŭ jăk siam".

Phung thơ̆ng kơ bruă lač, mâo ƀiă êdi 5 mta bruă dưi mđing kơ klei yuôm bhăn ti wăl msat đưm A Man, anăn jing anôk phŭn, rup mdơ̆ng dŭm boh msat, mnơ̆ng yua rŭ mdơ̆ng leh anăn hlei pô dưi dơr, hŏng ênuk thŭn… Kiăng nai prŏng, nai prĭn Bùi Văn Liêm, Khua kiă kriê hđăp Knơ̆ng ksiêm hriăm kơ h ƀuê ênuk Việt Nam lač kơ dŭm boh msat đưm anei:

"Klei ksiêm hriăm kơ hƀuê ênuk hmei pia anei jing mta msat bi kƀĭn. Mta mnơ̆ng msat bi kƀĭnanei kreh dôk hlăm wưng thŭn mơ̆ng ênuk gưl 17 truh kơ ênuk gưl 19. Anei jing dŭm mta mnơ̆ng yua bi êdah klei bhiăn djuê ana, klei bhiăn leh anăn boh nik jing klei hdĭp mda, bruă knuă, mnơ̆ng dhơ̆ng, dhar kreh, ai tiê klei mĭn, hlăm anăn mâo wăt ai tiê klei mĭn mơ̆ng mnuih ƀuôn sang Việt ti kwar Krah, Việt Nam."

Tui ksiêm kơ hƀuê ênuk dhar kreh krĭng lăn brei ƀuh: krĭng nah tluôn krông Cái hlăm sa wưng sui tuôm jing leh anôk bruă knŭk kna mơ̆ng krĭng lăn Phú Yên mơ̆ng akŏ ênuk 17 truh kơ knhal jih ênuk gưl 19. Hlăm ênuk đưm, ti krĭng anei mâo leh sa êpul mnuih mâo kơhưm hlăm yang ƀuôn; phung mnia mblei, phung mă bruă mbruă mdrŏng sah. Dưi yap diñu jing pô dŏ dŭm boh msat đưm ti čŏng čư̆ A Man. K'iăng nai prŏng, nai prĭn Bùi Văn Liêm lač bruă ksiêm duah krĭng msat srăng mkăp brei dŭm klei bi knăl kơ hdră êlan h ƀuê ênuk, klei hdĭp bruă duh mkra dhar kreh mnơ̆ng dhơ̆ng, hdră bi mjĕ mjuk dhar kreh mơ̆ng sa krĭng lăn.