Hruê mlam găn êgao, Trần Thị Lan, 90 thŭn, ti ƀuôn Bến, să Ô Loan, čar Dak Lak ăt kuč pui hlăm sang pui điêt čiăng tŭk knă mnơ̆ng ƀơ̆ng huă kơ ñu leh anăn ung ñu thŭn anei 95 thŭn leh. Sang pui điêt hŏng kiêng msei 3 ƀĕ jơ̆ng, hlâo giê dưh hŏng mơô, êi hŏng hwiê, đĭng ƀhur pui sô leh, hŏng dŭm boh êi hŏng mơô pioh dưm mnơ̆ng ƀơ̆ng hŏng gŏ jiă leh asăp pui. Dŭm mta mnơ̆ng anăn ară anei amâo lŏ ƀuh ôh hlăm lu gŏ sang, ƀiădah ăt dôk tinei. Mơ̆ng sang pui anei, dŭm blư̆ huă ƀơ̆ng tăp năng braih kô̆, tăp năng mjai hŏng hbei ƀlang, hbei tao  Lan rông ba leh 7 čô . Hŏng Lan, ñu amâo djŏ knŏng jing kpur ôh ƀiădah lŏ jing anôk kriê pioh rup gŏ sang mơ̆ng dŭm hruê dleh dlan

"Kâo kkiêng mâo 7 čô anak, rông ba truh kơ prŏng. Ară anei djă pioh kpur pui jing anôk wĭt nao, jing klei bhiăn đưm, kpur pui jing ăt msĕ hŏng klei hdĭp pô, sang pô msĕ mơh, ti sang mâo sơăi kpur pui truh kơ ară anei."

Hŏng Trần Kim Thiên, wăt tơdah amâo djŏ grăp hruê kucc pui knă êsei msĕ si ñu ôh, ƀiădah mơ̆ng êi, hlâo giê dưh, đĭng ayŭ pui truh kơ jam hŏng hwiê…jing ñu pô mkra. Dŭm mta mnơ̆ng dhơ̆ng hrăm mbĭt hŏng diñu hlăm jih klei hdĭp leh anăn lŏ dơ̆ng dôk mbĭt dŭm thŭn mduôn khua. Boh sang pui hđăp leh anăn grăp mta mnơ̆ng dhơ̆ng, kma leh êlam lu mta klei bi hdơr kơ sa klei bi dôk ung mô̆ găn dua kdrêč tlâo êtuh thŭn:

"Ayŏng wĭt hrĭ mñam hŏng hwiê/ mkra hlâo giê dưh, čiăng mă adei jing mô̆. Jam anei drei nao hlăm dliê mă hwiê wĭt mkra, mơ̆ng đưm đă truh ară anei, aduôn aê pô yua mnơ̆ng anei, jing jar pioh dưm gŏ đăm hlơr.”

Ti lu krĭng ƀuôn sang čar Dak Lak, grăp hruê mơ̆ng dŭm kpur pui ti tluôn sang, asăp pui đung hluê čư̆ dliê, đang hbei, đang mtei. Hŏng gŏ sang Phan Hữu Lộc ti alŭ Mỹ Phú 1, să Ô Loan amâo dah gŏ sang Trần Thị Lịch ti alŭ Phú Hữu, să Hòa Thịnh, snăn mơ̆ng êa hlơr tŭk hŏng hla kyâo grăp aguah ưm, truh kơ gŏ bur brei kơ čô điêt, amâo dah dŭm mmông huă ƀơ̆ng jiă mnâo ƀuôn sang ăt dưi tŭk mơ̆ng kpur pui anăn. Mâo dŭm kpur pui dưi bi lar mơ̆ng ênuk anei truh kơ ênuk mkăn leh anăn ară anei ăt mâo aduôn aê, amĭ ama djă pioh, čiăng kơ wăt tơdah ti anôk nao anak čô ăt hdơr duah wĭt. Ñu jing mngăt ƀuôn sang, jing klei bi hdơr, jing rup jĕ giăm mơ̆ng gŏ sang.  Trần Thị Lịch mgei ai tiê:

"Kpur pui hrah anei rông jih gŏ sang, mâo tŭk mnơ̆ng leh anak čô wĭt huă ƀơ̆ng. Têt snăn kpur pui anei jing hruê sa  mphŭn dơ̆ng blah djuh, amâodah dưm klŏ hdăng hlăm pui, grăp mmông pui trơ̆ng nanao. Phung hđeh wĭt  wĭt huă djăp anôk amâo mâo ôh msĕ êsei amĭ knă.  Wăt tơdah êsei ti ƀuôn sang amâo mâo msĕ ti ƀuôn prŏng ôh, ƀiădah mnơ̆ng amĭ tŭk ya mmông ăt jăk, kyuanăn ñu nao kbưi hŏng ƀuôn sang ăt hdơr kơ amĭ ama."

Ayŏng Phạm Văn Long, khua alŭ Mỹ Phú 2, să Ô Loan, brei thâo, gŏ sang ñu mơ̆ng sui leh mlih yua kpur pui êran hŏng êa pui leh anăn mrâo anei yua leh kpur pui êran hŏng pui kmlă. Ñu yăl dliê, klei hdĭp bi mlih, sang pui dŭm gŏ sang mda asei ƀrư̆ hruê ƀrư̆ mrâo mrang hĭn, ƀiădah grăp blư̆ tuôm ƀuh dŭm boh sang pui ƀuôn sang, ñu msĕ si wĭt kơ dŭm thŭn mlan mâo amĭ, mâo aduôn kriê dlăng grăp blư̆ huă ƀơ̆ng, pĭt đih. Asăp pui ară anei ênưih ngă kơ ñu ƀlĕ êa ală, kyua klei mgei ai tiê:

"Êlâo dih aê aduôn pô tŭk knă hŏng djuh jing phŭn yơh, ară anei ăt mâo phung mduôn ăt djă pioh mơh kpur pui knă êsei. Grăp blư̆ pô ƀuh kpur pui jing bi hdơr kơ ƀuôn sang, pô hdơr kơ klei hdĭp mda hlăk hđeh pô, hdơr kơ ƀuôn sang, dhar kreh leh anăn klei bhiăn djuê ana Việt Nam pô. Kpur pui trơ̆ng snăn mơak, ñu brei kơ pô klei hơuh mđao hĭn.

Hlei pô tuôm kkiêng, đĭ hriê kơ prŏng ti krĭng ƀuôn sang, đĭ hriê kơ prŏng, đuê̆ mơ̆ng ƀuôn sang, truh kơ sa hruê ƀuh asăp pui mơ̆ng sa kdrêč sang, phŭn mtei, đung ti tluôn čư̆, krĭng ƀuôn sang, amâodah ƀuh asăp pui mơ̆n g djuh krô, adrăng, ƀlĕ êa ală amâo djŏ kyua asăp pui ôh. Up anăn, mnâo anăn amâo djŏ jing mnơ̆ng yuôm bhăn ôh, ƀiădah ñu dôk nanao hlăm ai tiê grăp čô mnuih leh anăn wăt tơdah nao kbưi ăt hdơr mơh./.