Festival dưi mkŏ mjing ti ƀuôn hgŭm Pleiku, să Biển Hồ leh anăn dŭm alŭ wăl riêng gah mơ̆ng čar Gia Lai, bi kƀĭn giăm 1.500 čô thâo mbruă. Pŏk kčưm jing hdră bruă ti să Biển Hồ mơ̆ng hruê 30/10 truh 1/11, hŏng knăm mphŭn pŏk ti wăl sang roong ƀuôn Ia Gri. Klei rang mdah hlăm brô 30 anôk rang mdah mnơ̆ng ƀơ̆ng, mnơ̆ng dhơ̆ng OCOP, mnơ̆ng jăk alŭ wăl. Hruê 31/10, să Biển Hồ hưn mthâo mnơ̆ng dhơ̆ng hiu čhưn ênguê êpul êya ƀuôn Ia Nueng leh anăn lŏ mkŏ mjing Knăm mơak sang roong mrâo mơ̆ng mnuih Jrai ti ƀuôn Ia Gri. Hlăm wưng anei, klei bi lông êran “Gia Lai City Trail - Klei hmăng hmưi krĭng čư̆ dliê” mkŏ bruă mjuăt ktang asei mlei hŏng bruă hiu čhưn ênguê mơ̆ng alŭ wăl.

Mơ̆ng hruê 6 truh kơ 8/11, dŭm mta bruă mđing ti ƀuôn hgŭm Pleiku, mâo knăm mơak êlan klông, bi mjĕ mjuk dhar kreh djuê ana, hưn mthâo mnơ̆ng ƀơ̆ng, mnơ̆ng lŏ hma leh anăn kphê Gia Lai. Hdră kdŏ mmuñ "Mlam knăm mơak čing čhar" mkŏ mjing tlam hruê 7/11 ti Wăl tač prŏng Đại Đoàn Kết, lŏ bi êdah wăl anôk dhar kreh mguôp hŏng klei hdĭp êpul êya, čiăng kơ phung tuê thâo săng hĭn kơ mnơ̆ng kriê pioh hluê hŏng klei bhiăn, bruă mkra mjing leh anăn klei hdĭp mơ̆ng mnuih ƀuôn sang. Wưng anei, Gia Lai mkŏ mjing knăm hưn mthâo klei bi mklă tŭ yap mnơ̆ng kriê pioh ala čar kơ kdrăp čing čhar Kơ Đơ mơ̆ng mnuih Jarai. Kdrăp čing đưm mâo 8 boh, ară anei dưi kriê pioh ti Sang kriê pioh mnơ̆ng Plei Ku./.