"Anei jing gưl tal êlâo kâo hriê ti Čư̆ Dăng Ya. Ƀuh arăng hưn hlăm hla pŏk yang ƀuôn tinei mâo knăm mơak snăn kâo ăt čiăng hriê čiăng bi mlih ai êwa. Kâo čiăng dlăng dŭm hdră bruă knăm mơak, hmư̆ klei mmuñ, dlăng klei kdŏ, dlăng arăng pơ̆k mñam leh anăn nao dlăng dŭm anôk čhĭ mnơ̆ng tinei."

Bi hŏng amai Lan, knăm mơak mnga tăng phĭ leh anăn čing čhar Čư̆ Dăng Ya lŏ jing sa klei jăk siam khădah mâo leh wưng hdĭp ti Gia Lai.

"Kâo hdĭp ti Gia Lai mâo 5 thŭn leh ƀiădah anei jing gưl tal êlâo kâo dưi nao hlăm knăm mơak mnga tăng phĭ, knăm mơak čing čhar Čư̆ Dăng Ya. Kâo hơ̆k mơak êdi. Boh nik, mnga tăng phĭ lu êdi, mjing wăl anôk jăk êdi. Tơdah hlei pô ka nao hlăm knăm mơak mnga tăng phĭ snăn nao lông sa blư̆ hŏ".

Amâo djŏ knŏng iêo jak phung hriê čhưn dlăng, tui ksiêm, Festival čing čhar leh anăn Hruê kăm mnga tăng phĭ - Čư̆ Dăng Ya lŏ mâo klei mđing dlăng mơ̆ng phung ngă bruă hiu čhưn ênguê. Mâo ƀô̆ mta ti Čư̆ Dăng Ya hlăm yan knăm mơak thŭn 2026, amai Phan Thị Thu Minh, Khua kiă kriê sa knơ̆ng bruă hiu čhưn ênguê ti Hà Nội, brei thâo:

"Ƀri wưng knăm mơak mnga tăng phĭ thŭn 2026, kâo hriê tinei čiăng dlăng. Kâo ăt hmăng hmưi, hlăm thŭn anei, hŏng klei bi mŭt mbĭt dŭm čar, knăm mơak mnga tăng phĭ srăng lŏ dơ̆ng mâo lu klei jăk siam kơ phung tuê hiu čhưn ênguê tơdah truh hŏng hdră hiu čhưn ênguê Gia Lai."

Hlăm ênuk mrô, grăp čô tuê hiu čhưn lŏ dưi jing sa čô yăl dliê kơ anôk truh. Sa pŏk rup siam, sa kdrêč video čih pioh leh klei hiu čhưn dưi đru kơ pŏk rup Gia Lai truh hŏng lu mnuih hĭn. Đức, sa čô tiktoker hriê mơ̆ng Đức Cơ, lač:

 “Hruê anei pô hriê tinei hŏng klei jing pô mkŏ mjing klei mrâo mrang mrô, čiăng ksiêm dlăng leh anăn mđrăm mbĭt hŏng ai êwa knăm mơak. Kâo ƀuh jih jang mnuih nao hgŭm hŏng klei hur har, bi nao check-in, mă rup dŭm anôk jăk siam leh anăn ba hlăm hla pŏk yang ƀuôn čiăng kơ ƀĭng găp hlăm ala čar leh anăn ala tač êngao dưi dlăng klei jăk siam mơ̆ng Gia Lai. Kâo čang hmăng yua kdrăp mă rup pô čiăng kơ jih jang mnuih ƀuh Gia Lai siam êdi”.

Mơ̆ng Festival čing čhar truh kơ Hruê kăm mnga tăng phĭ Čư̆ pui Čư̆ Dăng Ya, Gia Lai dôk mâo thiăm klei găl yăl dliê kơ pô hŏng dŭm boh tŭ yuôm jăk siam.

Leh anăn grăp čô hriê tinei, grăp pŏk rup dưi mă, grăp klei yăl dliê dưi kah mbha dưi jing leh sa bĭt kdrông ba klei jăk siam mơ̆ng krĭng lăn anei truh giăm hĭn hŏng phung tuê hiu čhưn ênguê.