Ti ƀuôn Kram, să Ea Ktur, čar Dak Lak, êpul tông čing mâo mkŏ mjing mơ̆ng lu thŭn hŏng anei leh. Leh bi mŭt alŭ, ƀuôn hlăk mlan 6 leh êgao, ênoh mnuih hgŭm hlăm dŭm êpul đĭ hĭn, hdră bruă ăt dưi krơ̆ng kjăp. Ayŏng Y Yôp Knul, mnuih hgŭm hlăm êpul brei thâo, êngao kơ čing Êđê dŭm mta, phung hđeh lŏ yua čing arap mơ̆ng mnuih Jarai, brô̆ T'rưng, brô̆ pŭt leh anăn lu kdrăp tông ayŭ djuê ana mkăn.

"Kdrăp pĕ tông snăn mâo nanao hlăm ƀuôn, klei hriăm snăn grăp hruê ăt hriăm. Tĭng drei snăn hlăk dôk mâo êpul tông čing hlăm ƀuôn, êlâo dih jing knŏng sa ƀuôn đuič, ênoh jing êbeh 30 čô, leh bi mŭt mbĭt snăn ênoh jing dua blư̆, ƀrư̆ lu hĭn mơh, wăt kdrăp pĕ tông, wăt klei kdŏ leh anăn kdrăp pĕ tông mkăn, lač kluôm jing jih jang knăm mơak amâodah jing dŭm mta mnơ̆ng mnuih ƀuôn sang nao mdah snăn mâo bi mguôp sơăi".

Ti nah Ngŏ čar Dak Lak, êlâo kơ bi mŭt mbĭt, čar Phú Yên mâo êbeh 20 êpul hgŭm tuồng, klei mmuñ ênhiang leh anăn đờn ca tài tử. Dŭm bruă dhar kreh knhuah gru ăt mâo dŭm êpul bruă Đoàn, Hội ba hlăm hdră bi mjĕ mjuk, bi lông čiăng jak iêu phung êdam êra.

Leh bi mŭt mbĭt leh anăn mkŏ dăp anôk bruă knŭk kna, knhuah dhar kreh jăk siam krĭng êa ksĭ mâo phung êdam êra mđing mjuăt bi hriăm leh anăn bi êdah, boh nik hlăm dŭm hdră bi mjĕ mjuk, bi lông ktưn gưl čar.

Phạm Ngọc Toàn, Khua bruă êdam êra să Tuy An Tây, čar Dak Lak brei thâo, dŭm êpul bruă êdam êra, êpul hgŭm ti nah gŭ lŏ dơ̆ng krơ̆ng kjăp dŭm klei bi lông mmuñ ênhiang, mbĭt hŏng dŭm bruă hâo hưn klei mmuñ cách mạng, mjing thiăm klei găl čiăng kơ phung êdam êra tui ksiêm kơ dhar kreh djuê ana.

"Hlăm wưng giăm anei snăn dŭm klei bi lông mâo dŭm gưl êpul hgŭm mkŏ mjing jêñ jêñ, hlăm anăn snăn êngao kơ hâo hưn dŭm klei mmuñ cách mạng snăn dŭm klei bi lông kơ klei mmuñ ênhiang ăt mâo dŭm êpul, êpul hgŭm ti nah gŭ mkŏ mjing jêñ jêñ leh anăn mơ̆ng anăn snăn čiăng kơ phung ƀĭng găp dưi djă pioh dŭm knhuah gru dhar kreh mơ̆ng mnuih Việt Nam".

Bruă êdam êra mmuñ ênhiang djuê ana, tông ayŭ kdrăp djuê ana dưi rơ̆ng lu thŭn êgao ti Dak Lak. Knŏng thŭn 2024, klei bi lông gưl čar iêô jak giăm 200 čô kdŏ mmuñ amâo klă phŭn agha jing phung êdam êra hriê mơ̆ng 13 anôk bruă gưl kdriêk, hŏng 26 klei kdŏ mmuñ. Thŭn 2025, kyua hluê ngă hdră mkŏ dăp, bi mŭt anôk bruă knŭk kna, klei bi lông amâo dưi mkŏ mjing.

Truh mlan 10 thŭn anei, hlăm hdră bi hdơr 70 thŭn Hruê knhuah gru Êpul hgŭm phung êdam êra Việt Nam, bruă êdam êra čar Dak Lak lŏ mkŏ mjing klei bi lông, mjing wưng čiăng kơ phung êdam êra dŭm krĭng kwar bi mjĕ mjuk, hưn mdah dhar kreh knhuah gru.

Ayŏng Y Lê Pas Tơr, kiăng khua bruă êdam êra čar Dak Lak lač, bruă mkŏ mjing klei bi lông leh bi mŭt čar lŏ dơ̆ng mjing klei găl čiăng kơ dŭm êpul hgŭm, êpul êya dhar kreh phung êdam êra bi mjĕ mjuk, tui hriăm leh anăn hưn mdah dŭm knhuah mdê hjăn mơ̆ng alŭ wăl pô. Anei ăt jing sa hlăm dŭm bruă mâo bruă êdam êra čar Dak Lak krơ̆ng kjăp čiăng mtrŭt mjhar phung mda asei nao hgŭm kriê pioh dhar kreh djuê ana.

“Hmei hmăng hmưi jing srăng mâo lu klei mđĭ ai hĭn mơh, ăt msĕ mơh mjing anôk hlăp lêñ, wăl anôk čiăng kơ phung hđeh, dŭm êpul hgŭm bi êdah klei thâo kdŏ mmuñ ăt msĕ mơh klei thâo pô. Mbĭt anăn hưn mthâo, hưn mdah klei dhar kreh jăk siam mơ̆ng djuê ana pô truh hŏng lu ƀĭng găp hlăm kluôm čar”.

Amâo djŏ knŏng mâo thiăm mmông bi mjĕ mjuk, mơ̆ng grăp blư̆ hriăm mjuăt, mdah, phung mda asei ti Dak Lak ăt mâo thiăm klei găl thâo săng leh anăn bi mguôp hŏng dhar kreh djuê ana pô. Klei nao hgŭm mơ̆ng phung êdam êra hlăm dŭm êpul hgŭm, êpul kdŏ mmuñ ti alŭ wăl srăng đru kriê pioh dŭm ênhiang mmuñ djuê ana, ênai čing leh anăn kdrăp tông ayŭ mơ̆ng đưm hlăm klei hdĭp êpul êya.