Bruă anei mkŏ mjing mơ̆ng hruê 1 truh kơ hruê 24/11, mđing hưn mthâo dŭm boh tŭ yuôm dhar kreh mdê hjăn mơ̆ng krĭng êa ksĭ, krĭng dap mnai leh anăn čư̆ čhiăng, hluê anăn mjing klei bi mjĕ mjuk, bi hgŭm kjăp plah wah dŭm êpul êya mnuih ƀuôn sang. Mta phŭn mơ̆ng Hruê kăm Dhar kreh srăng mkŏ mjing mơ̆ng hruê 18 truh kơ hruê 24/11, mguôp hŏng hdră bi hdơr: Knăm mơak bi hgŭm mguôp jih jang djuê ana (18/11), Hruê knhuah gru dhar kreh Việt Nam (23/11) leh anăn Hruê dhar kreh Việt Nam (24/11).

Hdră mphŭn pŏk hŏng akŏ "Quảng Ngãi - Klei mmuñ bi hgŭm mguôp" srăng mkŏ mjing tlam hruê 18/11 ti Anôk bi kƀĭn - rang mdah čar, ƀuôn hgŭm Cẩm Thành. Klei êdah êdi mơ̆ng hdră thŭn anei jing klei lar bra mơ̆ng nah gŭ. Kluôm 96 să, ƀuôn hgŭm, wăl krah leh anăn 1.098 krĭng ƀuôn sang ti alŭ wăl čih anăn mkŏ mjing Hruê knăm. Hlăk anăn, krĭng nah Yŭ ti ƀuôn hgŭm Kon Tum mkŏ mjing nanao Klei bi lông čing čhar, kdŏ čhuang leh anăn wăl dhar kreh mnơ̆ng ƀơ̆ng OCOP ti êlan mlam Đăk Bla.