Klei bi kƀĭn mâo klei hgŭm mơ̆ng dŭm knơ̆ng, dhar bruă, alŭ wăl, phung thơ̆ng kơ bruă, anôk bruă duh mkra leh anăn anôk bruă ngă bruă hiu čhưn ênguê. Hlue si hră čih hdră bruă, Dak Lak tă hdră mđĭ kyar hiu čhưn ênguê hlue si hdră mtah, kjăp, mguôp ho’ng răng mgang dŭm ênoh yuôm dhar kreh alŭ wăl, mnơ̆ng dhơ̆ng hdĭp leh anăn mkŏ mjing mnơ̆ng dhơ̆ng hiu čhưn ênguê mdê hjăn krĭng Lăn Dap Kngư.

Dŭm mnơ̆ng dhơ̆ng phŭn dưi bi mklă jing hiu čhưn ênguê hiu dlăng, msei msăn, hiu dlăng dhar kreh êpul êya, hiu čhưn ênguê lŏ hma, hiu čhưn ênguê kphê, hiu čhưn ênguê dlăng êman leh anăn mguôp hŏng wăl dhar kreh čing čhar Lăn Dap Kngư. Hlăm klei bi trông, phung bi ala lač Dak Lak mâo lu klei găl mđĭ kyar hiu čhưn ênguê kyua mâo dliê, drai êa, ênao êa hŏng knhuah dhar kreh mdê hjăn Lăn Dap Kngư. Khădah snăn, hiu čhưn ênguê Dak Lak ăt adôk lu klei kpăk đuôm msĕ si anôk bruă nah gŭ ka bi knar, kƀah mnơ̆ng dhơ̆ng jăk, hdră bruă mlam adôk kƀah leh anăn ka mâo lu anôk bruă duh mkra phŭn mâo ai lar bra. Čar ăt brei mkra mđĭ anôk bruă nah gŭ, ksiêm dlăng ya klei adôk mâo čiăng mđĭ kyar hnơ̆ng; mđing kơ dŭm mnơ̆ng dhơ̆ng mâo klei mdê hjăn.