Hlăm dhar kreh mơ̆ng mnuih Êđê, ênai čing amâo djŏ knŏng jing ênai mơ̆ng kdrăp pĕ tông ôh. Anăn jing asăp iêô mơ̆ng êpul êya, jing ênai bi êdah hlăm dŭm mmông yuôm bhăn mơ̆ng klei hdĭp mnuih. Hđeh kkiêng mâo ênai čing hơ̆k mơak. Tơdah mnuih mduôn khua wĭt hŏng aduôn aê atâo atiêt, ênai čing lŏ kwang.

Pô thâo mbruă Y Tŏ Byă, kreh iêo jing Aê Sa, ti ƀuôn Dang Kang, să Dang Kang, čar Dak Lak yăl dliê, ênai čing amâo mâo dưi kƀah ôh hlăm klei hdĭp. Ƀiădah čiăng dưi tông ênhiang jăk, phung hriăm tông čing brei mphŭn mơ̆ng dŭm ênhiang êdu êun hĭn - čing kram:

"Hluê si klei bhiăn, hlăm dŭm klei ngă yang mơ̆ng ƀuôn sang, ênai čing mâo nanao sa klei yuôm bhăn. Grăp blư̆ hluê ngă klei ngă yang, ênai čing lŏ dơ̆ng tông. Ƀiădah tal êlâo, brei hriăm hŏng čing kram. Tơdah thâo leh grăp ênai čing, diñu lŏ dơ̆ng hriăm leh anăn hluê ngă hŏng čing knah"

Mơ̆ng dŭm ênhiang čing kram tal êlâo, phung hriăm ƀrư̆ ƀrư̆ mưng hŏng grăp ênai, grăp ênhiang. Čiăng kơ ênai čing kdrăm kơah hlăm dŭm klei bhiăn ngă yang, grăp ênhiang čing amâo djŏ knŏng ba dŭm ênai, ƀiădah lŏ ba dŭm boh tŭ yuôm dhar kreh dưi lŏ čuê mơ̆ng lu ênuk gưl. Pô thâo mbruă Y Ka Niê (Aê Cứu), ti ƀuôn Dang Kang, să Dang Kang, čar Dak Lak brei thâo.

“Ară anei kâo lu thŭn leh, ƀiădah kâo ăt gĭr mtô tông čing kơ anak čô hlăm ƀuôn. Truh kơ ară anei, kâo mâo mtô leh sa êpul, phung hđeh thâo tông leh dŭm ênhiang čing kâo mtô. Kâo čang hmăng anak čô lŏ dơ̆ng hriăm leh anăn kriê pioh ênai čing, čiăng amâo luič ôh knhuah dhar kreh djuê ana pô.”

Hŏng klei ktrâo atăt jih ai tiê mơ̆ng phung thâo mbruă, ai êwa hlăm dŭm mmông hriăm tông čing hlăm ƀuôn sang mâo nanao klei hơuh mđao. Anăn amâo djŏ knŏng jing hriăm klei tông sa ênai čing ôh. Anăn lŏ jing hdră čiăng kơ phung hđeh thâo săng hĭn kơ dhar kreh mơ̆ng djuê ana pô. Mâo hđeh mrâo 7 thŭn dơ̆ng mphŭn hriăm hŏng čing kram. Mơ̆ng sang dlông, ênai čing tui hluê hŏng phung hđeh truh kơ sang hră, truh kơ dŭm klei bi kƀĭn êpul êya. Ayŏng Y Tloi Niê (Ama Tra), sa čô mnuih ƀuôn sang ti ƀuôn bi êdah:

“Bruă kriê pioh, răng mgang leh anăn mtô bi hriăm čing čhar kbiă hriê mơ̆ng klei pô čiăng mơ̆ng mnuih ƀuôn sang hlăm ƀuôn sang. Hmei ăt mtô nanao kơ anak čô, mơ̆ng phung hđeh điêt truh kơ phung khua thŭn. Boh nik, phung khua thŭn lŏ mtô kơ anak čô mơ̆ng 7 truh kơ 8 thŭn, mbĭt anăn mprăp mtô kơ phung hđeh sang hră gưl 2.”

“Alê khua êbŭng čăt", ƀiădah ti anăp klei bi mlih pral mơ̆ng yang ƀuôn lu phung mda asei ăt mŭt hlăm klei nao kbưi ngă bruă duh mkra, snăn amâo djŏ ôh grăp blư̆ ƀuôn sang dưi bi kƀĭn djăp ênŭm êpul tông čing mda asei. Anăn ăt jing klei mđing uêñ mơ̆ng pô thâo mbruă Y Cheo Byă (Aê Bươm), ti ƀuôn Dang Kang.

"Sĭt nik, êpul phung thâo mbruă hmei thŭn leh khua, ƀiădah ăt hrăm mbĭt hriăm mjuăt nanao. Yuôm bhăn hĭn jing alŭ wăl čiăng mâo hdră êlan mtô bi hriăm snăn bruă kriê pioh leh anăn bi lar čing čhar srăng mâo boh tŭ dưn jăk hĭn. Anei amâo djŏ jing bruă knŏng phung thâo mbruă hmei ôh, kyuadah thŭn hmei leh khua, êdei anăp amâo lŏ djăp ai dưi nao hiu mdah ôh."

Ênai čing Dang Kang hruê anei ăt mčhĭt muăt grăp yan knăm mơak. Ƀiădah leh grăp ênhiang čing kdrăm kơah anăn jing lu klei mĭn mơ̆ng phung thâo mbruă mduôn. Klei khăp leh anăn klei gĭr mơ̆ng phung thâo mbruă dôk lŏ čuê klei "mngăt êwa" mơ̆ng krĭng lăn prŏng hŏng ênuk gưl hđeh. Čiăng kơ grăp blư̆ mlam truh, ti krah krĭng lăn liă lia, arăng ăt dôk hmư̆ ênai čing kwang msĕ si ai êwa ka tuôm mdei mơ̆ng ƀuôn Dang Kang./.