Hdră hŏng akŏ "Mơ̆ng Huila truh kơ tar rŏng lăn" mơ̆ng Anôk bruă bi ala Colombia ti Việt Nam bi hgŭm hŏng dŭm anôk bruă, êpul êya ƀuôn prŏng Đà Nẵng mkŏ mjing. Ti hdră, phung kdŏ mmuñ êdam êra Colombia hưn mthâo kơ mnuih ƀuôn sang leh anăn phung tuê hiu čhưn ênguê Hội An dŭm mta klei mmuñ, kdŏ mmuñ jăk siam msĕ si Bambuco, Rumba Campesina, Rajaleña leh anăn Sanjuanero.

Nao hgŭm hlăm hdră lŏ mâo phung hđeh ƀuôn prŏng Đà Nẵng. Mơ̆ng dŭm hdră bi mjĕ mjuk, phung hđeh dua ala čar mâo thiăm klei găl bi tuôm, kah mbha leh anăn thâo săng hĭn kơ dhar kreh hdơ̆ng pô. Bruă ngă dôk hlăm hdră mtrŭt mđĭ klei bi mguôp bruă mjuăt ktang asei mlei leh anăn dhar kreh mơ̆ng Phŭn bruă hŏng tač êngao Colombia, mđing truh mtrŭt mđĭ klei ñŭ kma yang ƀuôn, hdĭp mbĭt êđăp ênang leh anăn bi blŭ hrăm plah wah dhar kreh, boh nik hŏng dŭm bruă ngă kơ phung hđeh êdam êra./.