Ti hang ksĭ Quy Nhơn, dŭm hruê anei, mâo lu phung tuê hiu čhưn ênguê. Ti anôk mnei êa ksĭ, ayŏng Hồ Văn Thắng, pô mă bruă đru dŏng sang jưh Hải Âu dôk nanao hlăm klei mprăp, kngan djă mlut, ală ktuê dlăng êa poh yă. Hŏng ñu bruă anei amâodưi ngơi mang ôh, kyua klei truh dưi mâo hlăm grăp mnĭt mmông.

“Kâo jing pô mă bruă đru dŏng, tuê mniê êa ksĭ ti alŭ wăl pô srăng mđing yơh, srăng mđing hŭi tam mâo klei truh srăng hmao nao đru, hmao dŏng mtlaih.

Amâo djŏ knŏng ti Quy Nhơn, ti anôk hiu čhưn ênguê Kỳ Co, ênoh tuê ăt đĭ lu, wăt hlăm mmông mđiă ktang yang hruê dơ̆ng. Êpul đru dŏng dưi dăp kriêr, cano dôk hlăm klei mprăp nanao. Phung tuê dưi mâo klei mtă amâo mâo luê nao truh êngao knhal mlut. Ayŏng Lê Thanh Hùng Anh, pô ngă bruă đru dŏng tinei brei thâo, êjai phung tuê lu, klei kpĭ bruă knuă prŏng hĭn, čiăng mâo klei mđing hĭn.

“Mnei êa ksĭ ti Kỳ Co mâo klei čuăn dŭm anôk mâo mlut đung jing êđăp êñañg, phung hđeh mnei giăm hang, tơdah nao kbưi srăng ayŭ ki brei hriê giăm hang. Tơdah phung prŏng nao anôk klŭn kŏ pô ăt ayŭ brei diñu hriê giăm hang.Tơdah mâo klei mjêč srăng yua mô tô mbĭt hŏng đĭng blŭ čiăng bi knăl kơ găp čô nao đru.

Mâo êpul đru dŏng, mbĭt hŏng kdrăp mlut brei ƀuh klei êđăp ênang kơ phung tuê. Ayŏng Nguyễn Hoàng Anh,  sa čô tuê mơ̆ng Hà Nội, bi myuôm bruă răng mgang klei êđăp ênang tinei.

“Kâo ƀuh ăt jăk mơh, thơ̆ng kơ bruă, lu anôk amâo mâo êpul đru dŏng msĕ sơnei, tinei mâo êpul đru dŏng leh anăn mlut đung ti êa ksĭ kâo ƀuh êđăp ênang leh anăn hơĭt ai tiê tơdah luê tinei”.

Hluê si klei čih yap, dŭm anôk hiu čhưn ênguê msĕ si Quy Nhơn, Kỳ Co, Eo Gió, Nhơn Lý amâodah Bãi Xép dôk iêo jak lu mnuih ƀuôn sang leh anăn phung tuê. Ƀiădah, klei arưp aram mngăt êa adôk mâo êjai đa đa dôk mâo klei ngă mang, luê truh kơ anôk êlam kbưi hŏng hang. Ti anăp boh sĭt anei, Bruă sang čư̆ êa alŭ wăl bi mguôp hŏng dŭm êpul bruă djŏ tuôm mđĭ klei hâo hưn, mtă mtăn leh anăn dăp êpul ngă bruă ti lu anôk.

Phan Tấn Hoàng, K’iăng khua Bruă sang čư̆ êa ƀuôn hgŭm Quy Nhơn brei thâo, alŭ wăl bi kluôm êpul ngă bruă đru dŏng hŏng djăp kdrăp yua, mkŏ mjing êpul mbha mmông mă bruă găl guôp, mbĭt anăn mđĭ hĭn klei ktuê dlăng.

“Khădah mâo êpul đru dŏng leh anăn hdră êlan đru dŏng ƀiădah ăt mtrŭt mjhar mnuih ƀuôn sang êjai mnei êa ksĭ srăng hơô ao mlut êjai luê kbưi hŏng hang ksĭ čiăng mâo klei êđăp ênang. Êngao kơnăn ăt dôk blŭ hrăm hŏng anôk bruă dưm camera ktuê dlăng bi mguôp hŏng gang mkhư̆ klei mngăt êa. Êjai ƀuh klei arưp aram hŏng phung tuê hriê ti Quy Nhơn kdrăp hưn brei răng srăng hưn mtam čiăng mâo hdră êlan djŏ guôp.”

Ti gưl čar, bruă rơ̆ng kơ klei êđăp ênang kơ phung tuê hiu čhưn ênguê ăt dưi ngă ktang phĭt. Khua Bruă sang čư̆ êa čar Gia Lai mñă leh kơ dŭm dhar bruă, alŭ wăl mđĭ hĭn klei ksiêm dlăng dŭm klei hlăp lêñ gŭ êa. Bùi Trung Hiếu, k’iăng khua knơ̆ng bruă dhar kreh, mjuăt ktang asei mlei leh anăn hiu čhưn ênguê čar Gia Lai brei thâo, bruă mkŏ mjing hdră ngă bruă pral, mbĭt hŏng klei ksiêm dlăng kjăp jing hdră êlan phŭn hlăm yan hiu čhưn ênguê anei.

“Khua Bruă sang čư̆ êa čar Gia Lai mâo leh klei uêñ mĭn kơ klei êđăp ênang phung tuê ti čuă dlăng alŭ wăl. Knơ̆ng bruă dhar kreh, mjuăt ktang asei mlei leh anăn hiu čhưn ênguê bi mguôp hŏng dŭm dhar bruă, alŭ wăl ksiêm dlăng kdrăp yua rơ̆ng klei êđăp ênang kơ phung tuê êjai mnei êa ksĭ, brei kơ yan mdei prŏng thŭn anei phung tuê hriê ti êa ksĭ gang mkhư̆ dưi mâo klei êđăp ênang hơ̆k mơak.”

Klă sĭt brei ƀuuh, êngao kơ dŭm klei gĭt mơ̆ng êpul êya djŏ tuôm, klei mĭn mơ̆ng grăp čô mnuih ƀuôn sang leh anăn phung tuê ăt jing klei bi klă. Hluê ngă djŏ klei mtă, amâo mâo luê ti dŭm anôk amâo mâo jăk, čŏng pô yua ao mlut êjai čiăng êdi srăng đru bi hrŏ jih hnơ̆ng klei truh tơl, čiăng kơ grăp blư̆ nao ti êa ksĭ jing klei kluôm dhuôm leh anăn êđăp ênang.