Ti ƀuôn H’Măng, să Ea Kar, čar Dak Lak, pô mbruă Y Dhok Du jing leh “pô mtô bi hriăm” kơ lu phung êdam êra khăp leh anăn čiăng hriăm tông čing. Dŭm klei tông čing ñu hriăm mơ̆ng aê ama, leh anăn lŏ dơ̆ng mtô kơ phung anak čô hŏng klei thâo pioh hlăm klei hdĭp. Lu thŭn ngă bruă mtô bi hriăm, Y Dhok Du ƀuh klei gun kpăk tơdah kriê pioh dhar kreh čing čhar ti ƀuôn sang.

“Klei dleh dlan kơ hnơ̆ng dŭm mta mnơ̆ng kriê pioh drei ka dưi bi mklă jih. Tal dua jing kdrăp mnơ̆ng, anôk mtô bi hriăm, mnơ̆ng mtô bi hriăm, leh anăn mtrŭt mjhar phung hriăm dleh dlan, kyua anăn čang hmăng gưl dlông mđing uêñ đru kơ anôk bruă ngă bruă găl ênưih lu hĭn”.

Klei Y Dhok Du bi mĭn amâo djŏ jing klei hjăn sa boh ƀuôn ôh. Ti lu anôk, bruă mtô bi hriăm dhar kreh djuê ana ăt knang hlăm klei thâo phung mbruă. Čiăng kriê pioh mnơ̆ng kriê pioh sui, lu mnuih lač brei mâo thiăm klei thâo leh anăn hdră  msir mtô djŏ guôp. Pô mbruă Tô Thị Mèn, djuê ana Tày, ti să Krông Pač brei thâo:

“Mơ̆ng sui kâo čang hmăng dŭm adŭ mtô mjuăt čiăng mâo klei thâo wĭt lŏ mtô kơ phung mda asei. Dŭm thŭn êlâo amâo mâo ôh adŭ hriăm mjuăt ƀiădah kâo ăt čŏng hiu hriăm, klei thâo pô dŭm mâo, si ngă snăn pô gĭr mtô kơ phung hđeh mrâo.”

Mơ̆ng Wăl dhar kreh čing čhar Lăn Dap Kngư mâo UNESCO bi mni, Dak Lak mâo leh lu blư̆ mâo hdră êlan kñăm răng mgang leh anăn mđĭ lar ênoh yuôm mnơ̆ng kriê pioh. Hdră mtrŭn mrô 3 mâo Êpul gơ̆ng bruă ƀuôn sang čar mtrŭn kơ klei đru răng mgang leh anăn mđĭ lar knhuah gru dhar kreh čing čhar wưng 2026-2030 lŏ dơ̆ng hlue ngă klă klơ̆ng klei kñăm anăn, hŏng boh phŭn jing đru kơ bruă mtô bi hriăm leh anăn mjing klei găl kơ phung păn kjăp mnơ̆ng kriê pioh mđĭ lar bruă ngă. Trần Hồng Tiến,  Khua Knơ̆ng bruă dhar kreh, mjuăt asei mlei leh anăn hiu čhưn ênguê čar Dak Lak brei thâo:

“Hmei kƀĭn đru hlăm hdră, amâo lŏ jing kriê pioh ôh ƀiădah jing răng mgang, hŏng 5 boh phŭn: tal sa kƀĭn răng mgang bruă mtô bi hriăm. Tal dua jing đru hdră êlan kơrŭ wĭt wăl dhar kreh čing čhar. Tal tlâo jing kƀĭn đru klă klơ̆ng djŏ tuôm kơ čing čhar, leh anăn dŭm êpul čiăng kơ digơ̆ ngă bruă jăk hĭn. Mbĭt anăn tal anei mâo sa klei mrâo jing hmei đru mkra mlih wăl êpul êya čiăng mkŏ mjing bruă ngă, yua mrô jih jang wăl anôk, bruă ngă dhar kreh anei čiăng kriê pioh êdei anăp, čiăng lŏ dơ̆ng răng mgang leh anăn mđĭ lar.”

Klei mrâo mơ̆ng hdră mtrŭn jing amâo djŏ knŏng đru kriê pioh ôh, ƀiădah mđing msir mgaih klei dleh dlan hlăm bruă mtô bi hriăm mnơ̆ng kriê pioh. Hjăn hlăm mlan 5 leh anăn mlan 6 thŭn anei, Dak Lak mkŏ mjing tlâo adŭ hriăm mjuăt kơ klei kriê pioh dhar kreh, đru kơ phung mbruă, phung dôk ba yua mnơ̆ng kriê pioh leh anăn knuă druh dhar kreh nah gŭ dưi mprăp thiăm hdră msir mtô leh anăn mkŏ mjing bruă dhar kreh êpul êya. Hlue si ayŏng Y Maih Mlô, ti ƀuôn Wiâo A, să Krông Năng, dŭm klei thâo anei dưi ba yua mtam hlăm boh sĭt ti alŭ, ƀuôn.

“Adŭ hriăm mjuăt klă klơ̆ng leh anăn sĭt, bi kƀĭn lu phung khua mduôn nao êlâo, phung khua mduôn bŏ hŏng klei thâo bi trông mbĭt. Kâo jing pô mda asei lŏ cuê mơ̆ng adŭ mtô bi hriăm anei snăn hmư̆ phung nai mtô kơ hdră srăng mtô ăt msĕ mơh dŭm hdră čiăng mjing ai êwa amâodah hdră msir čiăng hâo hưn mtô mblang, ba yua hlăm boh sĭt ti alŭ, ƀuôn. Gưl anei jing klă sĭt snăk.”

Dak Lak ară anei mâo dua mnơ̆ng kriê pioh amâo êdah klă bi ala kơ anak mnuih mâo UNESCO čih pioh hŏng lu mnơ̆ng kriê pioh dhar kreh amâo êdah klă ala čar. Hlue si Nai prĭn Nguyễn Thị Thu Trang, nai mtô Sang hră gưl prŏng Dhar kreh ƀuôn prŏng Hồ Chí Minh, čiăng kơ mnơ̆ng kriê pioh lŏ dơ̆ng mâo hlăm klei hdĭp mda êpul êya snăn êlâo hĭn brei mđing đru kơ phung dôk kriê pioh leh anăn mđup brei ênoh yuôm dhar kreh anăn.

“Kâo bi mĭn anei jing dŭm hdră msir hmao snăk, bi êdah klei mđing uêñ čar Dak Lak hŏng êpul djă pioh, lŏ čuê, mđup brei, hlue ngă ăt msĕ mơh jing êpul kmeh gơ̆ng, ngă bruă klam bi mklă hlăm bruă răng mgang leh anăn mđĭ lar ênoh yuôm mnơ̆ng knhuah gru dhar kreh mnuih djuê ƀiă. Anei ăt jing klei găl, klei mâo yuôm bhăn snăk čiăng mđĭ kyar bruă duh mkra ala ƀuôn kơ Dak Lak hlăm bruă bi mguôp mđĭ kyar hiu čhưn ênguê leh anăn mđĭ kyar hiu čhưn ênguê hơĭt kjăp”.

 Hdră mtrŭn mrô 3 dôk grăp knhuang thiăm ai ktang kơ phung kiă kriê leh anăn mtô bi hriăm kơ mnơ̆ng kriê pioh hlăm êpul êya ti Dak Lak. Tơdah bruă mtô bi hriăm mâo mđing uêñ hŏng dŭm hdră êlan klă klơ̆ng, dŭm ênoh yuôm dhar kreh mâo kriê pioh hlăm lu gưl ênuk srăng mâo thiăm klei găl čiăng lŏ dơ̆ng mđup brei, ksul mbŭ leh anăn bi lar hlăm klei hdĭp./.