Hlăm anôk prŏng siam ti Wăl tač Đại đoàn kết, ƀuôn hgŭm Pleiku, čar Gia Lai, ênai čing čhar kdrăm kơah, iêô jak lu mnuih ƀuôn sang alŭ wăl hŏng tue hiu čhưn djă kngan mjing kwang kdŏ čhuang êdu êun. Anei jing kdrêč tông čing “ngă yang kbao” kyua phung mbruă Jarai hriê mơ̆ng ƀuôn Mlăh, să Phú Túc, čar Gia Lai mdah. Êngao kơ ênghang čing đư, êpul mbruă mda asei lŏ mdah tông čing mrâo mrang hŏng ênhiang kdrăm kơah mdê hjăn, ba ai êwa jăk mơak, lu phung tue hriê ti Gia Lai khăp dlăng.

 “Kâo čang hmăng hdră anei srăng lŏ dơ̆ng rang mdah čiăng kơ kâo lŏ dơ̆ng hriê ti Gia Lai čiăng hgŭm hlăm hdră anei”

Adei Ksor H’Huế jing sa čô hlăm êpul tông čing mda asei mơ̆ng ƀuôn Mlăh, să Phú Túc brei thâo: grăp blư̆ dưi čŭt hơô kdrăp djuê ana, mbĭt hŏng êpul tông čing - kdŏ čhuang ti anăp phung tuê, kâo ƀun ktưn hưn kơ dhar kreh djuê ana Jarai pô ăt dưi djă pioh leh anăn khăp čiăng.

“Kâo hmăng hmưi knhuah siam dhar kreh djuê ana pô srăng lŏ dơ̆ng bi lar truh hŏng phung tuê ala tač êngao ăt msĕ mơh lăn čar  Việt Nam pô”.

Nao hŏng hdră “Tông čing knhal jih hruê kăm - lông dlăng leh anăn lông ngă” tal anei ti Pleiku, êpul phung mbruă ƀuôn Mlăh, să Phú Túc lŏ bi êdah klei ngă yang “Bi mni” - sa knhuah dhar kreh mơ̆ng đưm mơ̆ng mnuih Jarai. Hlăm ênai čing kwang ti krah čư̆ dliê, pô ngă yang ngă hdră akâo klei suaih pral, yan ƀuh pla mâo klei găl, ƀuôn sang êđăp ênang, anak čô bi mguôp leh anăn klei hdĭp trei mđao. Pô ngă yang jing mduôn ƀuôn Ralan Klil ti ƀuôn Mlăh, să Phú Túc, čar Gia Lai brei thâo, hdră bhiăn mâo boh tŭ dưn klei đăo knang, bi êdah klei bi mni mơ̆ng anak mnuih hŏng lăn adiê, hŏng phung yang.

 “Hruê anei hmei ngă yang, hmăng hmưi yang kơup mgang kơ gŏ sang êđăp ênang, suaih pral. Akâo kơ aduôn aê, amĭ ama hdĭp sui, anak čô mâo bruă knuă. Hmei myơr kơ yang sa drei ŭn knô, kjuh čeh kpiê, Hmăng hmưi yang mă, hơêč hmưi klei myun mdan, êđăp ênang. Akâo kơ yan buh pla čăt đĭ, mdiê boh hjiê, ktơr bŏ bŭng, mă bruă knuă mâo klei găl, mâo mnơ̆ng pioh, klei hdĭp trei mđao yâo mơak”.

Amai Kpă H’Nhung (mnuih Jarai) jing sa čô hiu atăt tuê ti ƀuôn hiu čhưn ênguê êpul êya ti Plei Chuet, ƀuôn hgŭm An Phú, čar Gia Lai brei thâo, mlan êlâo mâo êpul phung thâo mbruă tông čing mơ̆ng ƀuôn nao hgŭm hlăm hdră Tông čing knhal jih hruê kăm - lông dlăng leh anăn lông ngă” . Thŭn hriăm mrâo êgao, ƀuôn hiu čhưn ênguê êpul êya Plei Chuet drông leh 8 sang hră hđeh điêt, gưl 1, gưl 2 leh anăn gưl 3 mbĭt hŏng lu phung tuê hlăm leh anăn êngao lăn čar hriê dlăng. phung hđeh hơ̆k kdơ̆k đĭ kwưng, tăp mdiê, hriăm mñam bŭng, pơ̆k mñam, leh anăn čŭt hơô kdrăp djuê ana čiăng mă rup djă pioh. Amai Kpă H’Nhung brei thâo:

“Hlăm gŏ sang mâo ama, mâo amĭ, dŭm čô amai adei ngă bruă hiu čhưn ênguê yang ƀuôn, nao hlăm dŭm mta bruă mơ̆ng knăm mơak hŏng ai tiê hưr har, khăp kơ dhar kreh mơ̆ng aduôn aê đưm. Êpul tông čing Plei Chuet hmei, mâo lu ênuk gưl, êdam êra, êkei, mniê leh anăn phung thâo mbruă mda asei kyuanăn ai tiê ngă knăm mơak jăk êdi, hơ̆k mơak čiăng tông čing leh anăn kdŏ čhuang mơ̆ng mnuih Jarai drei. Hmei nao hgŭm tông čing, kdŏ čhuang hơ̆k mơak êdi, đru kơ phung tuê djăp anôk dưi dlăng. Hmei lŏ mâo thiăm klei hơ̆k mơak, leh anăn drông tuê hriê ti ƀuôn sang.

Bùi Trọng Hiền - Pô ksiêm duah kơ ênhiang mmuñ đưm leh anăn dhar kreh djuê ana Việt Nam (ti anôk bruă Ênhiang mmuñ ala čar Việt Nam) mâo lu thŭn bi mguôp hŏng dhar kreh dŭm djiê ana ti Gia Lai lač:

 “Čing čhar knhal jih hruê kăm jing anôk hlăp lêñ mrâo, mkŏ mjing klei găl kơ dŭm hlâo ring čing đưm mâo klei găl lŏ kwang. Hluê si kâo, drei čiăng djă pioh čing čhar srăng mâo dŭm êpul tông čing leh anăn dŭm hlâo čing đưm leh anăn srăng mâo klei găl rang mdah. Hmei ƀuh gru hmô bruă hiu čhưn ênguê êpul êya ba ênai čing jing mnơ̆ng dhơ̆ng leh anăn jing êlan drei srăng tiŏ”.

Ti krah čư̆ čiăng Pleiku, Gia Lai, ênai čing kwang, klei kdŏ čhuang mbĭt hŏng knhuah siam dhar kreh Jarai jing klei amâo mâo dưi wơr hlăm ai tiê phung tuê. Amâo djŏ knŏng klei ktuê dlăng, “Čing čhar knhal jih hruê kăm - lông dlăng leh anăn lông ngă” lŏ đru kuč mngač ai hdĭp mơ̆ng wăl anôk dhar kreh čing čhar Lăn Dap Kngư.