VOV4.Êđê- “Dŭm alŭ wăl amâo ngă ngơi mang,  mprăp bruă ngă tơdah mâo klei ruă Covid-19 ti alŭ wăl.” Anei jing klei mñă klă mơ̆ng Khua phŭn bruă mdrao mgŭn Nguyễn Thanh Long hlăm Klei bi kƀĭn trực tuyến “Mđĭ ktang bruă gang mkhư̆ klei ruă Covid-19” hŏng 63 čar, ƀuôn prŏng mkŏ mjing aguah hruê 16/4. Blŭ hrăm mphŭn pŏk klei bi kƀĭn, Khua phŭn bruă mdrao mgŭn Nguyễn Thanh Long mñă klă: Klei ruă Covid-19 ăt dleh ktuê dlăng tar rŏng lăn, anei jing klei lông dlăng hŏng dŭm ala čar leh anăn wăt hŏng Việt Nam. Hluê si Khua phŭn bruă mdrao mgŭn, ala čar drei hgao leh 3 gưl drei ruă tưp, truh wưng anei mâo leh 21 hruê ala čar drei amâo mâo ôh mnuih ruă Covid-19 hlăm êpul êya, dŭm bruă ngă mnuih ƀuôn sang lŏ dưi ngă msĕ hŏng aguah tlam. Mơ̆ng dŭm gưl mâo klei ruă tưp mâo leh lu klei hriăm ktuê dlăng jăk klei ruă Covid-19. Khua Phŭn bruă mñă klă: krĭng wăl ênưih tưp hĭn ară anei jing knông lăn Yŭ kwar Dhŭng leh anăn dŭm čar Yŭ kwar Dhŭng. Kyua anăn, dŭm alŭ wăl brei hyuă kjăp bruă ksiêm dlăng êlan knông lăn. Phŭn bruă mdrao mgŭn bi hgŭm leh hŏng Phŭn bruă lĭng kahan mđĭ êpul nao ti dŭm kđông găk răk knông lăn.

Pô mblang: H’Zawut Ƀuôn Yă