VOV4.Êđê- “Phung mplĕ hră ruah khua hriê mơ̆ng anôk mkăn, dôk hlăm dŭm anôk mâo klei bi ktlah srăng dưi mplĕ hră ruah Pô bi ala Quốc Hội gưl 15 lehanăn HĐND ti anôk anăn”. Anei jing sa hlăm dŭm klei mtô mơ̆ng adŭ bruă Quốc Hội kơ bruă ruah khua ala čar hruê 20/5, mơĭt kơ dhar bruă ruah khua dŭm čar, ƀuôn prŏng hlăm gưl dlông kơ bruă ksiêm dlăng, bi klă klei dưi mplĕ hră mơ̆ng dŭm čô mplĕ hră dôk ngă bruă gang mhkư̆ klei ruă tưp Covid-19. Bruă bi mklă klei dưi ruah khua dŭm čô mplĕ hră dôk hlăm dŭm anôk bi ktlah ăt ngă djŏ hŏng klei bhiăn ruah Pô bi ala Quốc Hội gưl 15 lehanăn HĐND, mâo klei mtô mơ̆ng êpul bruă ruah khua ala čar hlăm hră mtrŭm mrô 234 kơ bruă mkra hră anăn dŭm čô mplĕ hră lehanăn hdră êlan mplĕ hră kơ dŭm čô dôk ti anôk bi ktlah čiăng gang mkhư̆ klei ruă tưp Covid-19 lehanăn dŭm alŭ wăl mâo klei ruă bluh đĭ. Bi kơ dŭm čô dôk bi ktah ti sang, ngă klei bi ktlah yang ƀuôn tui hluê hdră mtrŭn mrô 16 mơ̆ng khua knŭk kna ƀiădah ka mâo anăn jing pô mplĕ hră hlăm anôk anăn srăng iêu mthưr kơ êpul ruah khua srăng ksiêm dlăng, čih anăn dŭm čô anei lehanăn mơĭt kơ bruă sang čư êa să dưi lŏ bi mbŏ anăn dŭm čô anei ti anôk ruah khua jing anôk bi ktlah.

Pô mblang: Y-Khem Niê