VOV4.Êđê - Hruê 13/5, êpul bruă ruah khua tar ala čar nao ksiêm dlăng bruă mprăp kơ klei ruah khua ti lu alŭ wăl tar ala čar, čiăng rơ̆ng kơ hruê ruah khua dưi mâo klei êđăp ênang, jăk siam. Êpul ksiêm dlăng mơ̆ng dhar bruă ruah khua tar ala čar, êpul bruă ruah khua ala čar mơ̆ng k’iăng khua lăn čar, k’iăng khua kiă kriê êpul ruah khua ala čar Võ Thị Ánh Xuân jing khua êpul mâo leh hruê mă bruă hŏng čar Dak Nông.

Ăt hruê anăn, êpul ksiêm dlăng mơ̆ng dhar bruă ruah Quốc Hội, êpul bruă ruah khua ala čar mơ̆ng Thượng tướng Nguyễn Văn Được, khua êpul lĭng kahan êlâo Việt Nam, khua hlăm êpul ruah khua ala čar ba anăp ăt mâo leh klei mă bruă hŏng dhar bruă ruah khua čar Dak Lak kơ bruă mprăp kơ klei ruă khua. Thượng tướng Nguyễn Văn Được čih yap yuôm bhăn dŭm boh tŭ dưn dưi mâo mơ̆ng dhar bruă ruah khua čar Dak Lak. Mbĭt hŏng anăn, mta kơ čar Dak Lak srăng lŏ hyuă kjăp dŭm hră mơar, klei bhiăn mơ̆ng gưl dlông, dŭm čar, kdiêk, să kơ bruă ruah khua. Uêñ mĭn kơ klei êđăp ênang, hmao ƀuh dŭm klei ngă ƀai čiăng bi rai hruê ruah khua, kñăm hlăm bruă rơ̆ng kơ klei êđăp ênang hlăm dŭm alŭ wăl jing kñăm hĭn. Dŭm gưl, dhar bruă srăng mâo klei hrăm mbĭt, bi mbha bruă knuă, bruă klam klă mngač, rơ̆ng kơ klei ruah khua dưi mkŏ mjing hŏng klei ngă phŭn mĭl pô, djŏ hdră bhiăn ala čar, lehanăn gang mkhư̆ klei ruă tưp.