VOV4.Êđê- Tlam hruê 23/3, ti Hà Nội, Êpul êdam êra cộng sản Hồ Chí Minh mơ̆ng Phŭn bruă kahan ksiêm mkŏ mjing leh Knăm bi hdơr 90 thŭn Hruê mkŏ mjing Êpul êdam êra cộng sản Hồ Chí Minh lehanăn tŭ mă Medai Răng mgang ala čar mrô 2. Blŭ hrăm ti knăm anei, Khua phŭn bruă kahan ksiêm Tô Lâm mtă kơ dŭm gưl bruă Đoàn lehanăn phung đoàn viên êdam êra hlăm Anôk bruă kahan ksiêm yang ƀuôn brei thâo săng klă nik hĭn, êlam hĭn djăp klei mâo, bruă klam hdră mă bruă mơ̆ng anôk bruă kahan ksiêm, hluê ngă kjăp dŭm asăp mtrŭn, hdră mtrŭn mơ̆ng Đảng čiăng mkŏ mjing dŭm hdră bruă djŏ guôp kñăm jak iêu, mđĭ lar bruă klam ba anăp mơ̆ng phung êdam êra hlăm klei hluê ngă bruă klam kđi čar, mkŏ mkra Đảng, êpul kahan ksiêm yang ƀuôn klă mngač, kjăp ktang. Ƀri gưl anei, bi ala phung khua kiă kriê Đảng, Knŭk kna, Khua phŭn bruă Tô Lâm mđup brei leh Medai răng mgang ala čar mrô 2 kơ Êpul êdam êra Phŭn bruă kahan ksiêm kyua dŭm boh tŭ êdah kdlưn hlăm hdră kdơ̆ng mblah lehanăn mjuăt bi hriăm kdơ̆ng mblah, đru mguôp yuôm bhăn hlăm hdră bruă mkŏ mkra lehanăn răng mgang ala čar Việt Nam yang ƀuôn ngă phŭn./.

Pô mblang: H’Nêč Êñuôl