VOV4.Êđê- Hruê 14/4, Êpul mă bruă mơ̆ng Êpul hgŭm ruah khua ala čar mâo Thượng tướng Võ Trọng Việt- Khua Dhar bruă răng mgang klei êđăp ênang ngă khua êpul mâo mmông ksiêm dlăng, ktuê dlăng bruă rơ̆ng kơ klei êđăp ênang leh anăn mdrao mgŭn mprăp ruah khua phung bi ala Quốc hội leh anăn HĐND dŭm gưl wưng thŭn 2021-2026 ti čar Gia Lai. Hluê si Knơ̆ng bruă ruah khua čar Gia Lai, alŭ wăl mkŏ mjing leh 3 anôk bruă ruah bi knar hŏng 3 anôk bruă ruah phung bi ala quốc hội leh anăn dŭm anôk bruă ruah khua HĐND dŭm gưl, mkŏ mjing 1438 êpul ruah khua ti dŭm anôk bruă mplĕ hră hlăm kluôm čar. Mbĭt hŏng anăn, čar ăt mkŏ mjing 2 klei bi kƀĭn bi trông, bi leh dŭm klei bi kƀĭn mă klei blŭ mguôp phung bi ala kơ mnuih ƀuôn sang ti anôk dôk. Klei bi kƀĭn bi trông tal 3 mĭn tĭng srăng dưi mkŏ mjing hlăm hruê 17-4 kơ anăp.

Kơ klei êđăp ênang, Gia Lai mâo leh anôk dlăng bruă, bi kdơ̆ng tŭ dưn hŏng dŭm klei mĭn soh čhuai, kčŭt mčhur, lăm lui klei hâo hưn soh, phung roh djŏ tuôm kơ phung mgơ̆ng asei. Mbĭt anăn, čar ăt hlăk mđĭ lar bruă ngă mơ̆ng 24 anôk bruă gak răng leh anăn 10 êpul hiu gang mkhư̆ klei ruă Covid-19 ti krĭng knông lăn bi knông hŏng Campuchia…Hlăm mmông mă bruă, Thượng tướng Võ Trọng Việt- Khua Dhar bruă răng mgang klei êđăp ênang mơ̆ng Êpul hgŭm ruah khua ala čar bi mni kơ bruă rơ̆ng klei êđăp ênang leh anăn mdrao mgŭn kơ klei ruah khua čar Gia lai, mbĭt anăn đaŏ knang bruă mkŏ mjing ruah khua srăng tŭ jing jăk.

Pô mblang: H’Zawut Ƀuôn Yă